الأربعاء، 15 ديسمبر 2010

حزب إسلامي معتدل ؟

أيا قلنا السلام على من اتبع الهدى (بالله كل واحد يسلك في هدى على روحو من غير ما تحضبو الكل ورا هدى وحدة برك

 قبل ما نبدا تهناو ما نيش حاكي في السياسة و ذلك للأسباب هاذي 



1- ما نجموش نحكيو على سياسة قبل ما نحققو المواطنة الساعة, تو كي نوليو (إلي عند ربي موش بعيد) مواطنين و مواطنات و معادش رعايا ولا جيابت أمبو و قتها (اللطف اللطف , الشر برا و بعيد) توا نحكيو في السياسة

2- في السياسة كيما في الحومة يلزمك يا معانا يا مع لخرين و عندك شكون حاميك و ساندك, ما تنجمش تهتم بالسياسة ونتي ولد باب الله و لاك مل الأنصار لا المهاجرين لا من السلالة الشريفة (شا الله أولياء الله , عدي يدك على وجهك لا طيح فيك حلالف بسم الله

)

3- السياسة و قلبان السترينغ (الدنيا غلات الفيستة بعناها من هاك العام) :
الدنيا مع الواقف؟ والكلها تحب تاكل الكتف؟شكون بش ياكل اللية ملا ؟



4- باش تقترف السياسة في بلادنا يلزمك تكون كجلمود صخر حطه السيل من علي


إذا نقلبو علينا هالسحن و ما نحكيوش في السياسة خليها للمكر و المفر


لاش كاتب هل كليمتين و متاغي فيها أهل البر و الإحسان أوس و خزرج و وندال؟


أنا يا سادة يا مادة, بهيم و مسطك و المخ على قدو لذا سايسوني
أنا مسلم و نمن بربي و رسولو (سامحونا على التربريب) أما نسكر و نزنا (لمن استطاع إليه سبيل) جايبها معتزلة و العقل قبل النص براف
نمن الي كل واحد حر يمن بلي يساعدو وإني نحترم باش يمن واجب ماهوش مزية
نمن زادة الي الإنسان وصل درجة من الوعي من أيمات الكونترا سوسيال متاع روسو (اييييه يا حسرة) باش ينضم أمورو وحدو من غير ما ربو يبعثلو شكون يقلو الزانية قداش من جلدة يلزمها باش تتربا 


نعتقد الي الدين حاجة خاصة و الدولة حاجة عامة ولي يحب يصلي يصلي في الجامع موش في مجلس النواب (الي كي بيه كي بلاش من الإستقلال لتوة ما اقترح حتى مشروع قانون و ما رفض حتى قانون قدمته السلطة التنفيذية,حتى بالكذب ولا كاميرا كاشي لا)


نمن الي تونس هويتها أعرق و أقدم من العرب المسلمين الي جاوها غزاة كيما جاو قبلهم و بعدهم


قاعد نسمع الي فمة مشروع حزب ديني معتدل في تونس و الي البروتوتيب متاع الرئيس الجاي متاعنا –سامحوني نقصد الخليفة – يساند (مرتين سر و مرتين جهر) هل المشروع


هنا نجيو لبهامتي البقري و وين نستحقكم باش تعاونوني

اش معناها حزب ديني معتدل


خوذوني على قد عقلي و جاوبوني على هالأسئلة البسيطة


 : غدوة كان هاج علينا الزيتون و ولا التجمع الزيتوني هل



1- بش يمنع الخمر و البروموسبور و الرياضة النسائية؟
2- بش يقع تطبيق الشريعة و العقاب الجسدي و فكان الزكاة و الجزية و الخراج؟
3- بش تولي اللحية إجبارية و شرط من شروط البوڨوسيتي ؟
4- بش تولي الصلاة إجبارية؟
5- بش تتنحى حكايات داروين مل الكتب؟
6- بش يسكر مجلس النواب و يتنحى القانون (اش نندبو بيه, و نعملو في القوانين لواه الكلو من عند ربي) ؟
7- سؤال رقم 7 نخليوه فارغ يتبع النظام السابق 
8- بش نوليو نعرسو ب 4 و نطلقو بالكلمة ؟
9- بش نوليو نحطو المذهب في بطاقة التعريف؟
10- بش نوليو في الستاد نعيطو يا شيعي يا حاوي؟
11- بش نوليو نعملو صلاة استخارة و نشوفو الرؤية كي بش نبدلو الخليفة؟
12- بش نوليو بالتقويم الهجري و الأحرف الهندية؟
13- بش نشنقو اليساريين و العلمانيين الي يعملو في الفتنة على باب سعدون و باب بحر؟

كان أي وحدة من هاذم نعم و الله العظيم مش كي يبدا صخر و  فرام و فتيان السلاحف الكل,هاني من أعدائكم إلا يوم الدين
كان الكلهم لا, تي مالا لوغة ديني هاذي تعبوية و لتحريض المشاعر و عملان قاعدة و كيفكم كي التجمع كي حزب الديك أعطيكم الكرسي و ماكلة الكتف؟


رغم التهريج و التكوميك راني نحكي بجدي, اش معناها حزب إسلامي معتدل و هل أنو وصفو بالإعتدال ينحي عليه التدين و تقعد كلمة إسلامي

 هاني جوست ماركتينغ لإستقطاب القواعد؟

هناك تعليق واحد :