الثلاثاء، 18 يونيو 2013

كابوس رشيد عمّار.. أو القضية المفتاح في فهم سر القناصة




هذه القضية ليست كغيرها من القضايا، هذه قضية مفصلية، قضية مفتاح، فتحها و تحويلها إلى قضية رأي عام -رغم تجاهل وسائل الإعلام لها- سيحمل الإجابات لكل قضايا الشهداء و الجرحى، سيسقط الرؤوس و يصحح التاريخ .. تاريخ الثورة التونسية. نشر هذه القضية، تداولها، تحويلها إلى القضية الأولى هو واجب نحو الوطن، واجب نحو التاريخ

أذكر بتفاصيل القضية
التاريخ 16 جانفي 2011،المكان  بنزرت
الإحداثيات الجغرافية الدقيقة لمكان الحادث
+37° 16' 17.49", +9° 52' 8.59"



دورية عسكرية تحت قيادة الرائد منذر بنوري متمركزة أمام بنك الإسكان
تارزي يقوم بفتح حانوته، يشوف مرسداس قديمة يهبطو منها أربعة لابسين فيستات كحل و مهبطين فاليجات دخلو للعمارة إلي بحذا حانوتو

التارزي مشى يجري للجيش يحكيلهم

رجع معاه الرائد منذر بنوري، الوكيل بالبحرية الوطنية سفيان بن جمالة 

طلق رصاص من أعلى العمارة : إصابة الرائد بنور في الكتف و قنص  الوكيل بالبحرية سفيان بن جمالة : سفيان بن جمالة كان يرتدي خوذة مضادة للرصاص و واقي صدري : الرصاصة كانت في الرقبة، رصاصة من محترف، رصاصة للقتل العمد

حضرت مروحية عسكرية، تمت ملاحقة القناصة، واحد منهم طاح تكسرت ساقو، واحد آخر تشد و التأخر الغير مفهوم للتعزيز سمح للزوز الأخرين بالهروب

موش كان التعزيز تأخر، حتى الإسعاف، تفيض روح الشهيد  الوكيل سفيان بن جمالة في إنتظار طويل للإسعاف

المرحوم الشهيد سفيان بن جمالة


جمع غفير من المواطنين شهدو الواقعة، و تسليم من قام بقنص جنود و تم تصوير عملية التسليم بالفيديو

لكن.. القضية لم يتم التقدم فيها منذ أكثر من سنتين

مروان بوقرة يعلم أرملة الشهيد الي لاهم قناصة لا فمة سلاح، هاذوكم فقط تجمعيين خايفين تخباو على العباد

أكثر، الشهيد  الوكيل سفيان بن جمالة يحاكم بعد وفاته لمخالفته التراتيب العسكرية و يحكم بعشر سنوات سجن! إيه نعم، إنه يخلي موقعه أمام بنك الإسكان و يهب لنجدة مواطن معرضا نفسه للخطر، إسمه مخالفة التراتيب العسكرية! ملاحقة القناصة و تأدية الواجب ولا إسمه في عهد رشيد عمار مخالفة التراتيب العسكرية

أتعس، الرائد المصاب بنور اليوم تستعمل معه العصى و الجزرة ليسكت إلى الأبد : فرصة ليعين ملحق عسكري خارج الوطن و في نفس الوقت هو لايزال تحت طائل محاكمة لمخالفة التراتيب العسكرية و يرفض مقابلة أرملة الشهيد و الشهادة في قضية زوجها

الرائد بنور أعلمه مروان بوقرة إنه إذا يحب يشد صحيح في قضيته، يلزمه يستقيل

تعتيم كامل على القضية، ترهيب للشهود، لا أسماء لا محاكمات لمن وقع القبض عليهم

سنتين و القضية في طور التحقيق، سنتين لا تقدم، لا آثار، لا أبحاث، لا سجلات

مهزلة، كارثة، وصمة عار، لكن هذه المرة الأمر يختلف

في ماذا تختلف هذه القضية؟ ماذا تفيدنا؟

أولا، في هذه القضية القبض على القناصة بعد إطلاقهم النار موثق، حضره عدد كبير من الشهود ، الأدلة قاطعة على أن إختفائهم هو بتدبير من الجيش، ولا يمكن التبرير بأنه إشتباه و موش قناصة : وقع القبض عليهم بسلاحهم بعد إطلاقهم النار

ثانيا : إصابة الرائد بنور، تقدمه مخاطرا بحياته يفيدنا أن ضباط لجيش الوطني أبرياء من القناصة، هم تقدمو لحماية المواطنين في مخالفة صريحة للأوامر،إذا مادام الضباط غير مشمولين بالقناصة، و القناصة إختفو بعد أن تسلمهم الجيش فموضوع  القناصة قد يكون إذا  من مشمولات القيادة العليا أو لعلها مآمرة سياسية قيادات الجيش طرف فيها أو ربما مدبرة مع مخابرات أجنبية و لا علاقة بضباط الجيش بها، ما يؤكد هذا : تأخر التعزيزات مما سمح لزوز قناصة بالهرب

ثالثا : محاكمة من تقدم لحماية المواطنين لمخالفة التراتيب العسكرية يوحي بأن من نسق مواقع الوحدات العسكرية كان يعلم مواقع القناصة و يريد ترويع و قتل التونسين دون تدخل الجيش، و المحاكمة هي ليكونو عبرة لمن يعتبر: مخالفتهم للأوامر و تقدمهم لإفتداء تونسيين بدمائهم أفسد المخطط و ترك شهودا قد يكشفون كل اللعبة، هاهم إذن حتى بعد الإستشهاد، يحاكمون، و بكل حزم

هذه القضية هي المفتاح، مفتاح لغز القناصة، مفتاح سقوط رشيد عمار : القناصة أمسك بهم، الرائد بنور مازال حيا (إلى متى؟؟)  ، الشهود موجودون : الثورة تكمن في هذه القضية التي يحاول رشيد عمار طمسها، هي كابوسه لأنها الوحيدة التي ترك فيها شهودا و صارت الأمور عكس ما كان مخططا له



العميد بوقرة، بعد عزله في ظروف غامضة، أسر إلى أحد الضباط المتقاعدين أنه لو توفرت له الحماية الأمنية و الرغبة السياسية، بإمكانه فتح ملف القناصة بكل الحقائق، و أن رؤوسا كبرى ستقع..

التضحية بهذه السهولة بجنود من الجيش، تشبه لحد كبير أحداث الشعانبي

الفيديو الأول : القبض على القناص الأول : تسمعون بوضوح :"أنا شديتو، نحيتلو المكحلة، بعد عليه السلاح" و بعد تلسيقه للحيط و أخذ أوراقه الجندي يصيح :"ولد التميمي"



إنتبه، الفيديو به كلام بذيء

ولد التميمي هذا، الي هاو مصور تشد و بالسلاح في بنزرت.. إختفى! لا وجود له، لا في
 الإيقاف لا في ملفات القضاء  


الفيديو الثاني : بكل وضوح : أربعة قناصة يستهدفون هيلكبتر عسكرية لقتل جنود و ضباط



هل أرواح الضباط و الجنود رخيصة لهذا الحد؟ لماذا من قنص و قتل أولاد هذا الوطن يختفون؟ لمصلحة من يختفون و تختفي آثارهم؟ كيف يقبل العسكريون هذا؟ مكان الشهيد الجملي كان من الممكن أن تموت أنت، و أن يتستر رفاق السلاح على من قتلك و تهان أرملتك و يذل أبنائك بعدك

من يلقي بالعسكرين للموت؟ من أجل ماذا؟ من يخفي القتلة؟

الصور واضحة! القتلة قبض عليهم الجيش، تصرف ضباط الجيش و جنوده : إطلاق النار على القناصة، التعرض للموت يرفع عنهم أي شبهة، هوما زادة عداوها عليهم..


يقعد كان القيادة العليا..


هذه القضية هي آخر ما بقي بعد أن طمست كل الآثار، بعد أن تعملت المسرحية و كملت، أقوم بواجبي كمدون و كإبن عسكري و كإبن شهيد في نقل أطوارها إليكم، متحملا عواقب سخط رشيد عمار و إنتقامه، القضية أمامكم، في عهدتكم، سيسألكم أبنائكم و التاريخ..هل أديتم واجبكم نحو الوطن و نحو الشهيد الوكيل بالبحرية سفيان بن جمالة الذي ألقى بنفسه أمام فوهات البنادق لتأمنو ؟ اللهم قد بلّغت





جنازة المرحوم الشهيد سفيان بن جمالة



إبن الشهيد سفيان بن جمالة، الذي لن يعرف أباه، و بسبب صمتنا و رشيد عمار، لن يعرف أبدا قاتل أباه

الأربعاء، 5 يونيو 2013

العميد مروان بوقرة.. سر الإختفاء



أحداث هذه القصة أغرب من الخيال، لاحظو أني لا أكتب بإسم مستعار، بل بإسمي و لقبي الحقيقيين، متحملا النتائج القانونية و الأخلاقية لسرد هذه القصة

القصة تمس رشيد عمار، القضاء العسكري، و هي خطيرة جدا

بعد أيوب المسعودي و إختباء الجميع خوفا و جبنا
بعد مهزلة قضايا الشهداء و الجرحى التي يتناساها الجميع
بعد حكيم البوغانمي الذي يحاكم وسط تجاهل الكل فقط لإنتقاده خدمات المستشفى العسكري
بعد الرقيب أول بدر الدين التليلي الذي "إنتحر" خنقا بقميصه بعد دردشة مصالح الأمن العسكري معه
بعد موت آمر فصيل مختار مباركي ب10 رصاصات، لأنه حسب عائلته، شكك في حكاية الشعانبي

لا أعتقد أن أحدا مازال يشك في سطوة رشيد عمار اليوم، أعلم أن التبعات قد تكون وخيمة.. و رغم ذلك أتحمل المسؤولية كاملة عن القصة


القصة سأسردها بالأسماء، دون خوف، ليعلم القارئ ماذا يحدث في المؤسسة العسكرية اليوم

من هو مروان بوقرة؟

هو عميد في الجيش التونسي، رغم دراسة متعثرة جدا في الحقوق، تمكن بفضل "أولاد بلاده" من تسلق الرتب العسكرية بسرعة خرافية، ربما قد لا تعلمون كم مفيد في الجيش أن تكون من صيادة، حمام سوسة، بو حجر، المهدية و ما جاورها ،الي مستغرب، ال5 جنرالات الي تحت رشيد عمار اليوم، ال5 م المهدية


بفضل أولاد البلاد، يتجاوز مروان بوقرة جميع من في دفعته، و حتى من سبقوه بأربع دورات، ليجد نفسه مديرا للقضاء العسكري بعد فترة "تربص" قضاها بين الأمن العسكري و الشرطة العسكرية تحت إمرة رشيد عمار، بعد المؤامرة التي دبرت للعميد موسى الخلفي، ليأخذ رشيد عمار مكانه

العميد كان مقربا جدا من رشيد عمار، هو ذراعه الباطشة في القضاء، هو صاحب مهزلة زيادة الحكم لأيوب المسعودي في الإستئناف، هو صاحب مهازل محاكمة قتلة الشهداء، هو من يصفي في حسابات رشيد عمار مع علي السرياطي (حسب ملف القضية علي السرياطي موقوف لأنه عضو في لجنة أمنية، رشيد عمار عضو فيها أيضا، السرياطي في الحبس و الماريشال طليق..)، هو أيضا صاحب السرك القضائي حيث رضا قريرة و رشيد عمار يعملان معا، ينسقان معا، يتآمران معا، و وحده قريرة يحاكم

اليوم قريرة و السرياطي يتحاشيان ذكر إسم الماريشال، إما لأنه هددهما بالسكتة القلبية 
أو وعدهما بالعفو الرئاسي



بوقرة هو أيضا الوسيط في قضية براكة الساحل بين الجنرال و ضحايا القضية، حيث عرض على الضحايا فقط التعويض المادي مقابل عدم الزج بلحبيب بولعراس ، عبد العزيز بن ضياء و القيادة العسكرية العليا في التسعينات : الجنرال بن حسين و الجنرال عطار و الأميرال الشريف و الجنرال فرزة (مدير عام الأمن العسكري) و الجنرال قزقز (مدير القضاء العسكري) و.. رشيد عمار رئيس لجنة التأديب
ثم تأتي الأوامر من فوق.. و تنفذ بحذافيرها.. و يغلق القضاء العسكري التحقيق في الملف نهائيا

مقابل كل هذه الخدمات الجليلة، العميد بوقرة غلط في روحو..و يرتكب الخطأ الثالث، الخطأ القاتل..

الخطأ الأول كان تصريحه لوسائل الإعلام في أوت 2011 أن القناصة ليسو إشاعة و هم ينتمون للجهاز الأمني، تصريحات رغم خطورتها وقع التكتم عليها، و إختفى القناصة من ملف شهداء الثورة

الخطأ الثاني، كان موافقته على دسترة القضاء العسكري و عدم ممانعته من رفع الحصانة على رشيد عمار و خاصة إستئناف النيابة العسكرية لقضايا أرادها الجنرال أن تغلق

الخطأ الثالث و القاتل : جلسة خاصة ، العميد بو قرة ينسي نفسه و يقول :كان ما جيتش أنا راهو رشيد عمار في الحبس، الي شادو عليه يرميه وراء الشمس، أنا نعرف دوالبه، كان نحب غدوة نوقفو

الوشاية توصل سخونة للماريشال

في ليلتها، الماريشال يتصل بالعميد صلاح الدين القلالي من قسم الأعصاب و الامراض النّفسيّة  بالمستشفى العسكري، يطلب منه باش يستظيف العميد بو قرة في دارو

العميد بوقرة يجي، يعطيه العميد القلالي شهادة طبية إنه مهبول و فيها راحة بشهر

العميد بوقرة فهم الي الدنيا دارت عليه، و قرر باش يدخل في مواجهة مباشرة مع الماريشال : اللجوء للمحكمة الإدارية لإلغاء قرار عزله 


يجي من غدوة الصباح بش يدخل لمكتبه في المحكمة العسكرية، يلقى بيروه مسكر، و زوز شرطة عسكرية في إنتظاره

مباشرة يقع إعتقاله بصفة غير رسمية، و تسفيره قسرا إلى فرنسا 

عائلته أعلمت أنه تعرض لجلطة و ذهب لفرنسا للتداوي

العميد مروان بوقرة وقع إبقائه لمدة  في المستشفى العسكري 
val de grace
 بفرنسا، قسم الأعصاب




الأطباء الفرنسيون يؤكدون الشهادة الطبية التي قدمها العميد صلاح الدين القلالي، ملف طبي قديم يخرج إلى السطح(إصابة مروان بوقرة بإكتآب أول التسعينات، إكتئاب وقع علاجه بقسم الأعصاب بالطابق 11 من المستشفى العسكري و لم يمنع بوقرة من الترقيات بسرعة غير مسبوقة و العمل حتى وصوله إلى إدارة القضاء العسكري) : كملت المسرحية، إتسكر المنداف


في نفس الوقت، وقع إعفائه من رئاسة القضاء العسكري و تعويضه بالعميدة فوزية بهية، من يصاب بجلطة ما يجريوش يبدلوه من نهارو..

بعد عودته من فرنسا، ألزم العميد بوقرة على الإقامة الجبرية بصفة غير رسمية و هدد ب"سكتة قلبية" أو بفضيحة و تلفيق قضية ضده إن تكلم

الحكاية بدات تفوح و التململ مس العديد من الظباط، حيث إختفى و أعفي من مهامه ظابط برتبة عميد، مدير القضاء العسكري في ظروف غامضة

سمح للعميد بوقرة بالظهور للعموم بعد فترة إحتجازه في بيته، بعدما كثرت الشائعات حول إختطافه و تسفيره قسرا إلى فرنسا و عزله في ظروف غامضة، مع التمسك بالرواية الرسمية : أصيب بجلطة، رواية لا يصدقها أحد ممن قابلو العميد بوقرة بعد ظهوره المفاجئ : يدخن بشراهة كبيرة جدا و لا آثار لأي تدخل جراحي عليه و المصابون بجلطة لا تتم متابعتهم بالطابق 11 من المستشفى العسكري

هذه إذا القصة الكاملة لتغيير مدير القضاء العسكري، لإختفائه المفاجئ، لعودة ظهوره منذ فترة وجيزة فحسب، أنقلها للرأي العام، متحملا كل نتائجها و عواقبها القانونية و الأخلاقية، بدون أقنعة و بالأسماء و الأماكن ليعلم التونسيون  أنه بينما يسهر جنود و ظباط على أمن الوطن مضحين بأنفسهم، يسهر آخرون على .. التمكميك و الخطف و الدوس على القانون

مروان بو قرة قد يستحق ما صار له، هو رضي أن يبيع الضمير و الوطن محاباة و تسترا على الماريشال، و هاهو الماريشال يخيره بين "السكتة القلبية"، مستشفى الرازي أو التقاعد

مروان بوقرة مازال بدون خطة، مراقب، و يبدو أنه فهم الدرس و سيرضى بالتقاعد و الصمت إلى الأبد

أعلم أن الكثيرين سيخافون من مجرد نشر هذا المقال، ربما قد أفقد الكثير من العلاقات و الأصدقاء ممن يخافون حتى مجرد ذكر إسم الماريشال، لا بأس، لم أخف من بن علي القائد الأعلى للقوات المسلحة و أبي حي يرزق، موش بش نخاف ملي كان يسبح بحمد بن علي و أبي الي كنت نخاف عليه اليوم تحت التراب

أنتظر حملة سب و كذب و تلفيق مثلما تعرض لها النقيب المهندس المتقاعد محسن الكعبي لمجرد كونه ذكر بحقيقة تاريخية : رشيد عمار هو من ترأس لجنة الطرد في قضية براكة الساحل

أنتظر "الصادق الأمين" العميد بن نصر يأتي كاذبا ليفند و يفتري، أو حتى يجيب العميد بو قرة لينفي : موش جديد على من قال أن عسكري "إنتحر" لمجرد التحقيق معه، و آثار التعذيب على جثته هي فقط "من الفجعة"

قد لا يصدق الكثيرون هذه الرواية، لكن وضعت عمدا بعض الإشارات و التفاصيل، سيعلم كل عسكري يقرأها أني أقول صدقا

أحمل الفريق أول رشيد عمار مسؤولية أي ضرر يحدث لي أو لعائلتي، و أعلم الجميع أني في صحة جيدة و لا أعاني أي مشاكل قلبية

لما أخرجت خيوط القصة الأولى على الفايسبوك، بلغني أن التحضيرات لرفع قضية ضدي حسب الفصل 22 : التقليل من إحترام الجيش الوطني، و تعليمات لمنعي من دخول تونس مجددا هي بصدد الدرس

فلهذا : العريفة "بدر"، ليلى غد???? ، الفضيحة الأخلاقية متع قابس و قبلها في الأكاديمية العسكرية الي عمل عليها السرياطي "ملف" هاو يتحاكم عليه اليوم، الهندسة العسكرية و تاليفونات "المدام"، العسكر الي يبني في الديار، رحلة المغرب، اللقاء مع كذا و كل شيء.. نزيد و إلا يزي؟

لا تهتمو بهذه التفاصيل، أذكرها هنا فقط كبوليسة تأمين، ليعلم الماريشال أني ربما أعلم أكثر مما يظن و أني قادر على حماية نفسي و هدم المعبد و أني ما نحكيش و ظهري عريان و الي الصوف.. يتباع بالرزانة

هذا المقال كتب على أنغام أغنية : روح م السوق عمّار



يتبع

الأربعاء، 24 أبريل 2013

إقتراحات في إصلاح التعليم - الجزء الثاني



في الجزء هذا متع المدونة، بش نحاول نكمل الإقتراحات الي نراها  كشاب تونسي تنجم 
تحسن في مستوى التعليم في بلادنا

التوجيه الجامعي : و ما أدراك ما التوجيه الجامعي




الإقتراح  بش نبداه .. برقم

هل تعلم أيه التونسي أنك لما تكون من تونس عندك حسابيا 26 مرة أكثر حظ ملي في قابس باش تدخل مدرسة عليا للتصرف


على كل 26 طالب يدخل مدرسة عليا للتصرف من ولاية  تونس ، يدخل واحد برك من قابس

على كل 33 طالب يدخل مدرسة هندسة من ولاية صفاقس ، يدخل واحد برك من تطاوين


الفرق يزيد يكبر كيف نوصلو للصيدلة و طب الأسنان و الهندسة المعمارية و الأكادمية العسكرية

يقول القايل عادي! خاطر صفاقس و تونس فيهم أكثر سكان، يتقدمو منهم أكثر عباد دونك أكثر حظ

كي نشوفو عدد المتقدمين من صفاقس و من تطاوين، نلقاو عدد المترشحين من صفاقس أكثر 5 مرات من المترشحين من تطاوين! مازلنا بعاد على 33 مرة

التفاوت موش كان بين الولايات! حتى في الولاية بيدها! الي من قلب العاصمة عنده 23 مرة حظ إنه يولي طبيب من الي في الكبارية، و إلي في صفاقس سونتر عنده 158 مرة أكثر حظ باش يولي طبيب ملي في عقارب-قرقنة

نسب الإنقطاع المبكر عن الدراسة تهمنا زادة في موضوع التوجيه : إلي من سوسة 85,4% يكملو لين ياخذو الديبلوم في حين 74,3% برك من قفصة

باهي هل تعلم أن 94,6% من الموجهين من قبلي يغادرو قبلي باش يقراو مقابل 29,2% فقط للي من سوسة أو المنستير

و زيد هل تعلم أن جامعة المنار 32,4% من أساتذتها الجامعيين هم من الصنف أ (أساتذة محاضرين) مقابل.. 1,6% فقط لجامعة القيروان؟

باهي و بالنسبة للي تخرجو سنة 2009، 65% من المتخرجين من جامعة جندوبة بطّالة مقابل فقط 20% للمتخرجين من جامعة تونس

يظهرلي فمة ما يكفي من الأرقام الي تبين مدى التفاوت في الفرص


(المصدر : محمد الهادي زعيم، دراسة لحساب المعهد العربي لأصحاب المؤسسات)

تفاوت نسب "ركوب المصعد الإجتماعي" (منغير ما نكذبو على بعضنا : الي يقرى فارماسي عنده إمكانية أكبر ملي قاري فلسفة إنه في يوم من الأيام ينسى الكار الصفراء) يفسرها في تقديري إنه الناس الكل صحيح تعدي نفس الإمتحان، لكن موش الناس الكل في نفس الظروف

الي يسكن زوز ميترو بحذا المكتب موش كيما الي يضرب 8 كم على ساقيه و نهار الي 
يفيض الواد ما يقراش


الي عنده مكتبة و صال برمانونس في الليسي موش كيف الي الصالة الي يقرى فيها الماء يقطر عليه
الأستاذ الباهي يحب يقري في تونس، ليسي سجنان ما يمشيلو كان المبتدإ و إلا المعاقب و فوق من قلبه

و من بعد نجيو للي الدار بحذا الليسي ، الليسي متاعو مجهز ، يقري فيه أستاذ طيارة نقولولو عدي نفس الإمتحان مع الي يمشي 8 كم، ما عندوش مخبر في الليسي و يقري فيه أستاذ معاقب؟

تونس ما عاشتش تنمية بنفس الوتيرة، و من ينكر التفاوت و عدم تكافؤ الفرص بين الشمال و الجنوب، بين الشرق و الغرب، بين سقانص و مطماطة و قرطاج و السيجومي ماهوش عايش في تونس

الي يحط جداول نسب الفقر و جداول الدخول لمعاهد و كليات "سامية" يلقاها تتقارب! دولة بورقيبة و بن علي تعملت باش ولد الي لاباس عليه تسهله حياته و ولد الزوالي تزيد تصعبهالو





إيه شنوة الحل؟وينو الإقتراح؟ كل حومة نعملولها باك وحدها؟

لا! الحل هو إسراع في التنمية و في الإنتظار نبدلو طريقة التوجيه

نعطي مثال
نفرضو جدلا تقدم 200 ألف تلميذ للباك
منهم 60 ألف من أريانة و 30 ألف من زغوان
نجح منهم 100 ألف
فيهم 40 ألف من أريانة و 10 آلاف من زغوان 




التوجيه الحالي
كليات الطب فيها 1000 بلاصة
نفرضو الي الألف لولانين حبو يوليو طبة الكل
الألف لولانين فيهم 400 من أريانة و واحد من زغوان
رغم الي ينجم يكون الثاني في زغوان خدم و تعب أكثر من رقم 399 في أريانة نلقاو للأسباب الي شرحتها الفوق : على 300 طبيب من فوق الروتإكس و حتى طبيب  من جبل الوسط

الإقتراح
موش قلنا تقدمو 60 ألف على 200 ألف من أريانة (30%) مقابل 30 ألف من زغوان(15%)؟ باهي

كلية الطب فيها ألف بلاصة
التقسيم ما يصيرش حسب المعدلات لكن حسب الولايات
في كلية الطب


يولي عندنا 300 بلاصة لأريانة : 30 بلميا

و 150 بلاصة لزغوان : 15 بلميا


يعني كل ولاية عندها الكوطا متاعها، و يا حبذا كل معتمدية
هكاكة الثاني متع زغوان و الثالث و الرابع يوليو طبة ، ياخذو فرصة

و هكاكة الي يمشي 9كم باش يوصل للمعهد يتنافس مع واحد قاري في ظروف كيفه : في كلمتين تكافؤ الفرص

النظام هذا كيف يتطبق، موش كان في الطب، أما في الكليات الكل و موش كان في الباك : عدد البلايص يتقسم بالكوطا حسب الولايات

حتى الي ظلمته الدولة تصبح عنده فرصة إنه يركب المصعد الإجتماعي

النظام هذا عندو إيجابية أخرى : كيف يولي عندي معلم من سجنان (مدارس ترشيح المعلمين توفى م الورقة الروز) و طبيب من تاكلسة و مهندس من الزريبة : غدوة ما يلقاش مشكلة باش يخدم في قريته


معادش الطبيب و المهندس و الأستاذ و المعلم الخايب المكسر هو الي يقري و يخدم في المناطق هذيكا، لكن ولد المنطقة الكفؤ الي خذا فرصة : كيف يولي في المناطق هذيكا فمة الأستاذ و المعلم و الطبيب الباهين، من عام لعام تتحسن الظروف و تذوب و لو ببطأ الفوارق

الإقتراح هذا ماهوش عادل 100% : حتى في المعتمديات بيدها فمة تفاوت، لكن يقعد أكثر عدل من النظام الحالي

و بالطبيعة، النية الحسنة ما تكفيش : يلزم قائمة الداخلين في كل فاك تتعلق للعموم بسكوراتهم، و كل مواطن ينجم يثبت ثماش شكون بكتف فكلو بلاصة وليدو مع عقوبات بالسجن لمن يتلاعب، لأنك كي تحرم من يستحق كلية الطب تكون لعبت ربما بمصير عائلة كاملة و بدلت مستقبل إستحقوه.. ب8كم مشي كل يوم


لما بديت نكتب في التدوينة هذه، كنت ناوي نحط 3 أو 4 إقتراحات، كيما التدوينة الي قبلها، لكن ظهرلي إني طولت، قلت خلي لجزء آخر منغير ما إنطول على القارئ الي عطى من وقته و إن شاء الله يكمل و يعطي من وقته و يتفاعل



نتمنى تكون تفاعلات خاصة من أهل الإختصاص، إصلاح التعليم هو مربط الفرس و 

الدور الأول للدولة هو الحرص أكثر ما يمكن على تكافؤ الفرص


الي ما قراش الجزء الأول و تهمو الإقتراحات هذا الرابط
http://goo.gl/2oeWL

الأحد، 10 مارس 2013

إقتراحات في إصلاح التعليم - الجزء الأول




مانيش بش نعمل مقدمات طويلة على دور التعليم و وجوب إصلاحه و إن يجب أن يكون أولوية : إلخ إلخ : ماهوش هذا هدف التدوينة هاذي و مانيش بش نحكي خير ملي سبقوني طول آلاف السنين و حكاو على أهمية دور التعليم في النهوض بالأمم

نحب نأكد إلي لاني خبير  بداغوجي لا تكنوكراط لا كفائة : و هذاكا علاش بش نحكي في الموضوع : شوفو تاريخ البشرية : أناهو الخبير الي بدل واقع : الخبير أسير نظريات و منغلق في دومان واحد، هل شارل دو قول خبير إقتصادي؟ هل سوكارنو خبير بيداغوجي؟ هل روزفالت خبير مصرفي؟ لوكان الخبراء قادرين فعلا على حل المشاكل لأنتفت الحاجة لأهل السياسة أصلا

ما عنديش الطموح متع جبت الصيد من وذنو و الوصفة السحرية الي بش تحل المشاكل الكل و منيش بش نتطرق للصعوبات و العوائق الي تحول دون تطبيق ما أقترح  ( وحدها يلزمها مجلد): هي مجرد إقتراحات، تجمعها نظرة وحدة متجانسة و يدفعها حلم، إقتراحات تكونت من الإطلاع على بعض التجارب، التجربة الشخصية و الملاحظات، هي إقتراحات تسوى إش تسوى، لكن كمدون نرى إلي من واجبي نحاول نقترح و نحاول نجبد بما نقدر جزء من الرأي العام نحو القضايا الجوهرية




نتمنى مربين، تلامذة أو أهل سياسة يتفاعلو، هي فقط مدونة ، بش نحاول نقدم الإقتراحات بشكل مقتظب لكن نكون سعيد لو واحد من القراء يحب يتفاعل بأكثر تفاصيل

هيا، يزي م المقدمات ، مرجتنا! ويني هالإقتراحات



الإيتود و ما أدراك ما الإيتود : الإيتود كيما قاعد صاير توة يطرح على الأقل خمسة  مشاكل

إنعدام مبدأ تكافؤ الفرص : معناها ولد الي لاباس عليه يصبولو بالقمع و يقرى و ينجح و تولي عنده فرصة باش يولي لاباس عليه في حين ولد الزوالي محكوم عليه يقعد زوالي


نشوف في بعض الردود الجاهزة : ييه كي تنحي الإيتود محسوب بش تعمل تكافؤ الفرص! ياسيدي هام أولاد الغنية ياكلو في الحوت و أولاد الزواولة يباتو بلاش! من باب تكافؤ الفرص أعمل قانون و أمنع الغنية من  إنهم يوكلو أولادهم
إنه تكافؤ الفرص هدف يستحيل إدراكه ما يعنيش إنه الدولة تسمح بتعميقه و ما تحاولش إنها تنقص منه إلى أقصى حد : هذا هدف الإقتراح الي بش نطرحه



 تشليك التعليم : كان التلامذة تفهم في القسم، لواه بش يقراو إيتود

تدعيم عقلية الهندي المقشر و الكسل الفكري : في عوض الي ما يفهمش يكسر راسو و يبحث و يلوج و يجتهد : برة بركة، توة في الإيتود نعملو سيري تشبه للدفوار

يتنحى الإحترام بين المربي و التلميذ و تنقلب العلاقة : ملي كان التلميذ هو الي حاشتو بالأستاذ باش ينجح توة الأستاذ حاشتو بالتلميذ باش يخلص أقساط كرهبتو، فتتقلب الآية و يتشلك الأستاذ و التعليم 

مشكلة عدم المساواة أمام الضرائب :  الموظف البسيط كيف يزيد دينار في الشهرية، يدفع منه 350 فرنك ضرائب، الضرائب هذيكا تتبنى بيها السببطارات و تخلص بيها الأساتذة

الأستاذ الي عامل 6 قروبات إيتود، كل قروب فيه 10 من أولاد الموظف البسيط ب60 دينار الراس، ما يدفعش على الدخل هذا حتى فرنك ضرائب! دورو لا! يعني ما يساهمش في بناء السبيطارات و تخليص الأساتذة، يستفاد من مجهود المجموعة الوطنية، أما ربحو ياخذو خام ليه


باهي، وينو الإقتراح؟


نقترح منع الإيتود منعا تاما حتى السنة التاسعة، الي موش قادر يفهم تلميذ حاجات ببساطة الإبتدائي إش قادر يعمل؟

إعادة السيزيام و النوفيام كمناظرات وطنية : زرع عقلية التنافس و الإمتياز م الصغرة و كان تلميذ ينجح خاطرو ولد ساتي و إلا عنده مشكلة نفيقو بيه على بكري، و زيد كي  تولي مناظرات وطنية نفس الإمتحان للناس الكل و موش الي قراك يصلحلك  تولي وقتها الأساتذة بريماتهم تتحسب بمعدلات الي يقريو فيهم و إلي معدلات تلامذته أقل من خط معين يقع عرضه على لجنة علمية بيداغوجية للتقييم و كان لزم يعدي الصلاعة في تربص و رسكلة

نقترح زادة إلي إبتداءا م الأولى ثانوي الأستاذ الي يحب يقري إيتود، يطلب م الإدارة الجهوية قبل : تجيه و تتفقد المحل الي بش يقري فيه  و تفرض عليه بقداش الراس و إنه على الأقل 10% ملي يقريهم يقراو بلاش تبعثهملو و تختارهملو الإدارة الجهوية من أولاد الزواولة برشة، و بعد تعطيه تواصل، كل تلميذ يخلصه يعطيه شطر توصيل، كل تريميستة يصب التواصل في القباضة و يدفع 35% ضرائبه على الدخل كيف الناس الكل

الأولياء ينجمو يصبو شطر التوصيل الآخر في القباضة حتى هوما، و كانهم زواولة و إلا يقريو في برشة : الدولة ترجعلهم 35% ملي دفعوه و تعفيهم من الضرائب على الإيتود و ولد الزوالي يقرى زادة

بالطبيعة مع نفس عقوبات التهرب من دفع الضرائب الي تطبق على بقية المواطنين و عقوبات تصل إلى الطرد من السلك للي يخالف و يخدم مخه : موش أي واحد يستحق لقب مربي 

هكاكة على الأقل نخففو من وطأة مشاكل الإيتود 



باهي إنجيو للباب الثاني في سلسلة الإقتراحات


الإختيار و الإختبار : لما تشوف مستويات بعض المتخرجين من الجامعة، مخك ياقف

نتفكر مرة، عند مادام قعلول في الليسي، كان صدقني ربي نعمان القصوري وقتها إندرا إش من زلعة عمل : غزرتلو قتلو مانيش باهتة فيك كيفاه وصلت الرابعة ثانوي في معهد نموذجي، باهتة فيك كيفاه خذيت السيزيام

قعدت ديما نتفكر الحكاية هاذي لما نشوف مستويات  بعض الجامعيين : في المستوى و المنطق و اللوغة و الثقافة و حتى في مجال الإختصاص : كيفاه نجح في الباك هذا؟

مانيش بش نطول في الأمثلة و علاش و كيفاش، الإقتراحات

الباك ماهيش لعبة : لازم الدخول للجامعة يكون إستحقاق! يزينا من سياسة : فرح الشعب، نجح الناس الكل، خليه يكركر في الجامعة : مارينا منها كان الوبال

الحاجة الثانية : النجاح في الباك ما يعطيش الحق في الدخول آليا للجامعة ، نفسر 

نفرضو جامعة التاريخ في مطماطة عندها 100 بلاصة : موش معناها تقبل الميا الي يجيو! كل جامعة تحط شروط دنيا : إلي عندو أقل من 8 في السوري و 10 في العربي : أنا تاريخ بش تقراه يا كبدي

ما فماش 100 ملي طلبو الجامعة هاذي عندهم الشروط؟ فمة 70 برك؟ يزي نقري كان 70 عندهم مستوى و كيف يوصلو غدوة ينجمو يكونو حاجة باهية خير ملي عبي بركة محسوب

معناها تنجم تنجح في الباك و ما تقبلك حتى جامعة و تعاود العام لأنه مستواك غير كافي

مع رفع المستوى العام هذا  عندو أفنتاج آخر : مجانية التعليم بلحق 

 هل تعلم إنه ولد الزوالي اليوم يستحيل يولي طبيب أسنان و إلا مهندس معماري؟ خاطر سوم الأدوات اللازمة ما يقدر عليه كان ولد مهندس معماري و إلا ولد طبيب؟ هل تعلم إنه مجانية التعليم شعار فارغ؟ هل تعلم إنك اليوم كان تجيب 20 في الباك و تحب تعمل دونتار يعطيوك ورقة تصحح فيها كي تجي ترسم الي تتعهد باش تشري من فلوسك الأدوات الكل و كان ما في حالكش تطلب إعادة توجيهك : بالفلاقي كانك ولد عاملة نظافة و كليت الحجر باش توصل : مضمض و أغسل سنيك و أنسى كان أولاد الطبة يوليو طبة

كي تولي الجامعات معادش معبية و كان الي يستحق يدخل، تنقص مصاريف الدولة (الطالب الواحد يتكلف على الدولة معدل 3 ملاين و 400 في العام) تولي تنجم الدولة تتكلف بمصاريف الأدوات للزوالي و لولد الهجالة عاملة النظافة و يولي طبيب حتى هو و يمسح دميعات أمه 


 إقتراح آخر

منح البحث العلمي : هل تعلم يا مواطن إنه الجزء الأكبر من شهريات الأساتذة الجامعيين على مختلف درجاتهم هي منحة البحث العلمي

الي عمل الخلاص بالطريقة هاذي كان تفكيره : الأستاذ الجامعي يقري شوية باش يقعدلو برشة وقت للبحث و هانو خلاص السوايع شوية أما الجزء الكبير م الشهرية هو  تشجيع على البحث و الإنتاج و الإظافة

كي نشوف ترتيب الجامعات التونسية و عدد البحوث و النشريات و إنه أساتذة جامعية تخمم بلوغة 12 ساعة في الجمعة بمليون و أربعميا لا بحث لا عمار بو الزور ، لا إنتاج لا رشيد عمار نقترح التالي : بعد م ياخو شهادة الدكتوراة و ينجح في الكنكور متع أستاذ مساعد و يباشر ياخذ في منحة البحث، إذا في عامين ما بحث على شيء و ما خرج حتى أرتيكل : تتقسم المنحة على ثنين، العام الثالث الي قعد يزيد يتقسم على ثنين، العام الرابع تتنحى المنحة جملة : وخي كي إنت تمركي في سوايعك ماكش تبحث، خلي المنحة للي يستحقها : صدقوني كي تولي هكة الحكاية، و بما أنها منحة البحث أكثر من شطر الشهرية توة تشوفو في عشرة سنين إش يولي البحث العلمي في تونس من حيث الغزارة و كيفاه ترتيب الجامعات التونسية يطلع فلاش

نتعدا للإقتراح الي من بعدو.. و إلا تعرف كيفاش، نقسم المدونة على عدة أجزاء خير، طولت هكة و "خبرتي" بالأنترنات التونسي تخليني نعرف إلي موش برشة قراو حتى لهنا

نستنى تفاعلاتكم كان فمة و نكمل بقية الإقتراحات (برشة راهم) في أجزاء قادمة 

الجزء القادم إن شاء الله : إقتراحات في التوجيه، في المعاهد النموذجية و في الرياضة و مناهج التعليم 

الثلاثاء، 22 يناير 2013

هاو الأساتذة بش يعملو إضراب


 الأساتذة بش يعملو إضراب


على خاطر يحبو المناهج التعليمية تتحسن؟ لا أبدا

على خاطر يحبو مخابر للبحث؟ لا أبدا

إمالة يحبو العطلة تولي شهرين برك موش تلاثة، باش يحسنو مستوى التلامذة الضحل؟ لا لا أبدا

إمالة باش يقضيو على الإيتود منين هب و دب؟ لا يستحيل

إمالة لازم يحبو الإمتحانات تصعاب و تركز أكثر على الفهم و النقد و التحليل؟! لا موش هاذي زادة

إمالة باز خاطر الأقسام معبية و التلميذ ما ينجمش يفهم؟ حتى هاذي لا

أهيا، لقيتها! المكتبات في الليسيات فارغة، و يحبو الدولة تعمل إتفاقيات مع دور النشر باش أخر العناوين تبدى متوفرة للتلامذة؟! لا حتى هاذي لا

تي إمالة على شنوة؟ 

قلك يحبو زيادة في الشهرية
مرة أخرى؟ إيه مرة أخرى و كان تحل فمك تولي رجعي بندير الحكومة ضد العمال

هيا سيدي، هاو إش نقترح : الموظف البسيط كيف يزيد دينار في الشهرية، يدفع منه 350 فرنك ضرائب، الضرائب هذيكا تتبنى بيها السببطارات و تخلص بيها الأساتذة

الأستاذ الي عامل 6 قروبات إيتود، كل قروب فيه 10 من أولاد الموظف البسيط ب40 دينار الراس، ما يدفعش على الدخل هذا حتى فرنك ضرائب! دورو لا! يعني ما يساهمش في بناء السبيطارات و تخليص الأساتذة، يستفاد من مجهود المجموعة الوطنية، أما ربحو ياخذو خام ليه

نقترح تقنين الإيتود، و المراقبة الجبائية ليه، و خطايا جبائية لكل من يتهرب أو يصرح بأقل ملي يدخل، و هكاكة يكونو الأساتذة ساهمو كيف غيرهم في الضرائب ،كيفهم كيف الي يخلص في 400 ألف برك و يقري في صغارو إيتود بالسيف، و وقتها تتنفنف الأمور و نزيدو الأساتذة في الشهرية لا و الله و يفضل باش نزيدو نعمرو مكتبات الليسيات



لا عاد! خدمتهم متعبة! نعم بابا؟ متعبة؟ 18 ساعة في الجمعة 8 شهر في العام متعبة؟ إمالة كان جيت عسكري تضرب بالعامين كونجي لا و جمعة على جمعة تخدم 60 ساعة؟ كان جيت كواش تقوم 5 متع الصباح، و إلا بحار؟ إمالة إش يقول الي يحفر في المنجم؟

لا لا هوما متعبة للأعصاب

متعبة زعمة للأعصاب أكثر من خدمة المهندس الي كان يسهى لحظة طيارة إتطيح؟ من خدمة الطبيب الي كان يفقد تركيزو ثانية إنسان يموت؟ 

تي لا لا! هوما يحضرو كوراتهم! علاه خاطر بالكشي المهندس و المحامي و الكونطابلي ما يروحوش بشكاير خدم للدار و ما عندهمش جوان و جويلية و أوت

كان الدلال الفارغ، شكون ضربك على يدك قلك ولي أستاذ؟ تي ماك تجري و تجري و تعاود سنين في الكاباس و فمة شكون دفع الرشوة جملة! توة ولات خايبة؟ مرهقة؟ الشهرية شوية؟ ما في بالكش بيها م الأول محسوب

نعطيكم وذني نهار الي نشوفكم محروقين هابلين هايجين على المكتبات الفارغة، على المستوى الضحل للتلامذة، نهارة الي نراكم الساعة تدفعو في الضرائب على فلوس الإيتود، وقتها، كي تكونو أديتو واجبكم للمجموعة الوطنية من حقكم تطالبو المجموعة الوطنية بالزيادة، موش قبل


 أه سامحوني! ما يحبوش زيادة في الشهرية! أما زيادة في المنحة : الحاج موسى، موسى الحاج

أه شوف الطبيب! درجين ب40 دينار! علاه قاري قده إنت؟

الآخر قلك نحبو روترات بكري؟! معناها مع جوان و جويلية و أوت، يحب المجموعة الوطنية تبدا تصرف عليه على بكري! و العسكري إمالة وقتاه ياخو الرترات؟ و الي يحفر في المنجم! باهي سيدي ماك كي تجري و تجري باش تولي بروف في بالك بالرترات وقتاش



لا قلك، ما تعرفش علاش تحكي! خاطر هوما يعرفو الفرملي إش يعاني و العسكري إش يقاسي و البحار كيفاه عايش! و الكلهم يدفعو في الضرائب  و ما عندهمش جوان و جويلية و أوت


شوف نواب التأسيسي قداه يخلصو و مستخسر فينا زوز صوردي؟ الحل نصدمو على المجلس التأسيسي نهدوه على روسهم، موش نزيدوكم إنتوما

كيلو الفلفل ب1700 و ما تحبناش نتزادو؟ كيلو الفلفل ب1700 على الي يخلص في 400 دينار برك و يدفع في ضرايبه و يقري في أولاده إيتود، و الزيادة لعشرات آلاف الأساتذة من غير زيادة مقابلة في الإنتاج تعمل التضخم، و يولي كيلو الفلفل ب2500 و يقعد الموظف  يخلص في 400 دينار برك و يدفع في ضرايبه و يقري في أولاده إيتود

شكون قراك و ردك تقرى و تكتب! شوف هاك اللوغة! متطوع بالكشي! ماهو يخلص، و عاد هكاكة شكون داواك و شكون بنالك الكياس، لا خدمة إنجمو نعيشو بلاش بيها و لا واحد يخدم بلاش

أدي واجبك نحو المجموعة الوطنية و بعد طالبها، موش المجموعة الوطنية توة على ركايبها : توة نحلبها و بعد ما تشيح نذبحها و نسلخها

و بالطبيعة، النهار الي ما يخدموش فيه.. يخلصو فيه.. من ضرائب الي يدفع فيها الموظف الي  يخلص في 400 دينار برك و يدفع في ضرايبه و يقري في أولاده إيتود

كلامي موجه للأساتذة المواسونوز باتوز متع مصان فلوس الإيتود، الكلنا قابلنا منهم عرفنا منهم، كيما عرفنا زادة الأستاذ الي يترفع عن إنه يبيع العلم، يغزرلو رسالة موش سلعة و يعدي السوايع بعد الوقت يفهم و يوري، جائزته إنك تفهم، موش راس الشهر يبدا يتشوحر : ويني فلوس الإيتود

الأحد، 13 يناير 2013

عندما ترقص صاحبة الجلالة للسياسي : محسن مرزوق كمثال



أول حاجة نحب نبدا بيها الي مانيش بش نتناول الموضوع من ناحية أخلاقية و أخلاقاوية : حد ماهو حارس على أخلاق حد، ماناش بش نضربو بالحجر : الكلنا ديارنا بلار و زيد كيما قال السيد المسيح :مَنْ كَانَ مِنْكُمْ بِلاَ خَطِيئَةٍ فَلْيَرْمِهَا أَوَّلاً بِحَجَر

لكن زادة الغمة لا! موش خاطر فيها تفاصيل شخصية إنطفيو الضو علي فيها الكل! لا سيدي! هاذي إسمها غمة : بعض ملي جاء في المراسلات المقرصنة بين محسن مرزوق و الصحفية بجريدة المغرب كوثر زنطور  يهم الرأي العام،  يهم الناس الكل: علاقة السياسة و الأحزاب بالإعلام موضوع يهمنا الكل

نحب نأكد زادة الي أنا ضد القرصنة مهما كان نوعها، لكن لما نشوف قرصنة الجبالي كيفاه تداولها الجميع، نقول أنا ضد القرصنة، لكن القرصنة إذا صارت ما نتغاضاوش علي يهم الشأن العام في كل ما يكتشف و فقط الي يهم الرأي العام

محسن مرزوق بعد إسترزاقو من  من البترودولار الوهابي متع مراكز دراسات الشيخة موزة، و بعد العمل الجبار كرئيس منظمة العمالة فريدم هاوس في تونس، و مطالبته للسفير الأمريكي بضمان المقربين لبن علي و مهاتفته لصحافيي الجزيرة نهار 14 جانفي قائلا :"لازم بن علي يبقى" هو اليوم قيادي و مؤسس في حزب نداء تونس : يعني شخصية عامة و آرائه تهم الرأي العام

فقط نستحضر صورة موازية : دومينيك شتروسكان ما كانش في الحكومة وقت وسائل الإعلام تناولت الفضيحة متاعو، كان في المعارضة : السياسي رجل عام مهما كان موقعه

كيفاش العبد الفقير سمعت بالفضيحة؟ نلقا أرتيكل كاتبو اللحاس الرخيص (نسبة بقداش كان يلحس مقارنة بأندادو) نزار بهلول ينفي فيه الفضيحة و يلحس لمرزوق: قلت إمالة باز صحيحة، عاد قمت نلوج



آخر نقطة في المقدمة الطويلة هاذي : قبل ما ننشر هالتدوينة هاذي ثبتت الي المحادثة صحيحة و موش مفبركة
 كيفاش؟ 
على يسار المحادثة فما أصدقاء أخرين للصحافية، إتصلت ببعضهم و أكدولي الي الحساب المقرصن صحيح، هاو مرزوق يهدد باش يرفع قضية موازية علي زعمة فبركو المحادثات


  أنا لا قرصنت لا هبطت لا فبركت لا نبارك في يوم م الأيام حاجة هكة ، لكن إذا شكى بواحد زعمة خاطر فبركة (لن يفعل و هو كاذب كيف يقول إنه موش حسابه لكن حساب فايسبوك موازي) نكون سعيد باش نعطيه التأكيدات

باهي نجيو للمقاطع الي تهمنا، في حديث الشخصيتين العامتين الي يحكيو فيه على الشأن العام محسن مرزوق و كوثر زنطور

 الصورة الأولى 



إش معناها صحافي يعطي تحقيقه قبل صدوره لرجل سياسة؟ بأنا حق محسن مرزوق يتسائل علاش تهاجم فيه؟! هذه حرية الصحافة؟ هذه حرية الإعلام؟ لا و الي يعجبك، الصحافية تبرر في موقفها

تره تخيلو كان جاء في بلاصة محسن مرزوق مثلا لطفي زيتون: صحافية تحكيلو بالمسبق على إش بش تهبط و هو متغشش من صحافية كيفاه تهاجم في حزبو : راهي نقابة الصحافيين قلبت الدنيا و حصة خاصة في لاباس و ملف كامل في نسمة و الفايسبوك شعل و المقيم العام أعرب عن بالغ قلقه و السفارة الأمريكانية عن بالغ إنشغالها و إتحاد الشغل عمل إضراب و راهي خرجت مسيرة ضد رابطة حماية الثورة (إش مدخل رابطة حماية الثورة؟ ما عندها حتى دخل أما برة بركة ميسالش، راس الهم دادة عيشة) : علاش هذا الكل ما صارش؟ آخر الأرتيكل نقوللكم

نواصلو



في المقطع هاذا، محسن مرزوق يفسرلها علاش ما يلزمهاش تعمل هكة، و إلي الشيء هذا يضر بحزبه! بكل وقاحة، معناها هاك الكلام الكبير متع الحياد و الموضوعية و النزاهة طلع الكله خر طر، لا ساس لا راس لا ذات لا صيفات! محسن مرزوق بكل وقاحة يطلب من صحفية تخدم مصالحه الحزبية الضيقة الموازية ضد حزب آخر، موش تخدم الحقيقة و المعلومة! عادي ملي متربي في مدارس فريدم هاوس

تتخيلو كان جاء قيادي في النهضة يؤمر صحافية إنها تخدم حزبو على حساب نداء تونس إش كان يصير؟

نشوفو راي الصحفية : حزب تونس حزب إفتراضي، فقاعة إعلامية : لا برامج لا تصورات لا أفكار، فقط تجمع زعمة زعمة دستوري لاعبها ديمقراطي حول الباجي : هاذي قناعتها الشخصية

تره براو أقراو كتاباتها على الحزب و شوفو اليوم في إعلامنا قداش الصحافيين مهنيين و ما يكتبو كان الي مقتنعين بيه، هاو قناعتها العميقة تقولها من غير روتوش لقيادي في الحزب



قارنوها بإش تكتب للرأي العام


نتعداو



هانا نشوفو رأي القيادي في حزب نداء تونس في جريدة المغرب، يغني عن كل تعليق، إن شاء الله برك منخرطين حزبه يفهمو الي هي فقط جربدة موازية، أتعس من جرايد شفيق جراية

فقط نرد على الآنسة : تي هاي طلعت في آخر حلقة أتعس من جريدة الحرية : صحافيين تحت الطلب يكتبو عكس قناعاتهم خدمة لأشخاص في أحزاب سياسية

زعمة كان جاء الصحبي عتيق الي قال الكلام هذا، حتى في مراسلة خاصة على جريدة المغرب، موش راهو عمر صحابو ضرب وحده 3 ميدي شو باش يحكي على محاولة إندرى شكون على الهيمنة و إسكات الجريدة الحرة المناظلة متاعو؟

نواصلو



هيا تخيلو معايا كان صحافية من التلفزة الوطنية تصرح لمسؤول في النهضة :" أنا نحب برشة سي راشد و النهضة و ربي معاه"، قاعدين تتخيلو ماهو في نقابة الصحافيين و الفايسبوك و لاباس و القلابس و ميدي شو؟ تتخيلو في الدروس و الوعظ  و الإرشاد و إستقلالية الإعلام و تركيعه و رابطة حماية الثورة؟

و زيد هاو شهد شاهد من أهلها! هاي الآنسة زنطور الي تحب الباجي و تعاون فيه : نداء تونس الكله إنتهازيين! كان قالها عبد الرؤوف العيادي راهي الدنيا تشقت

نزيدو



يظهرلي موقف مرزوق ما يستحق حتى تعليق موازي : الي يهمه موش الخير لتونس، لكن الشر للنهضة، كرهه للنهضة أقوى من حبه لتونس



نزيدو نواصلو



تعريف الرشوة قانونا: القانون عدد 33 المؤرخ في 23/05/1998: كل شخص انسحبت عليه صفة الموظف العمومي أو شبهه وفق هذا القانون ويقبل لنفسه أو لغيره بدون حق سواء بصفة مباشرة أو غير مباشرة عطايا أو وعود ا بالعطايا أو هدايا أو منافع كيفما كانت طبيعتها لفعل أمر من علائق  وظيفته ولو كان حقا لكن لا يستوجب مقابلا عليه أو لتسهيل انجاز أمر مرتبط بخصائص وظيفته أو الامتناع عن انجاز أمر كان من الواجب القيام به يعاقب لمدة 10 أعوام وبخطية قدرها ضعف قيمة الأشياء التي قبلها أو ما تم الوعد به على أن لا تقل الخطية عن عشرة آلاف دينارا

 كما أن المشرع طال أصحاب النفوذ وأفعالهم المكونة لجريمة استغلال النفوذ
 Trafic d’influence 
 وهي جريمة أوسع مدلولا  لا تقتصرعلى الفعل المحصور من موظف عمومي ليطال أشخاصا آخرين لهم مراكز اجتماعية متقدمة في القطاع الخاص 

 الأركان القانونية لهذه الجريمة 

تتعلق بصفة الجاني إذ يجب أن يكون موظفا عاما أو شبهه

 يتعلق بالركن المادي وتتمثل في طلب الموظف أو شبهه لنفسه أو لغيره أو قبوله أو أخذه وعدا أو عطية أو منفعة

 يتعلق بالركن المعنوي ويتخذ صورة القصد الجنائي إذ لا تقع جريمة الرشوة إلا عمدا

 ان الركن المادي للجريمة والمتعلق بالوعد أو العطاء هو الذي عادة ما يسير على البحث والإمعان لدى فقه القضاء وشراح القانون

ذلك أن عادة ما يحصل الاتفاق أو التعاقد بين الراشي والموظف المرتشي على صورة معينة للرشوة كان يكون وعدا لتقديم شيء ما أو إعطاء هدية أو امتياز ما ويقبل ذلك الموظف أو شبهه بالعرض المذكور  وبناء على ذلك تتحقق جريمة الرشوة

بيد انه لا بد من التذكير من أن الجريمة تعد قائمة قانونا ولولم يتسلم المرتشي فعلا الشيء المقابل المتفق عليه  بل لمجرد الاتفاق والتعاقد الذي يتم بين الراشي والمرتشي 

 http://shr.tn/rtn1 المصدر 


هذا ما يقوله القانون التونسي، وينهم متع الفساد؟ متع طبق القانون! مانيش خبير قانوني لكن جريمة الرشوة تبدولي مكتملة الأركان : وعد بمنصب مهم قبل نهاية العام مقابل نقل الأخبار، الكتابة حسب الطلب و الخدمات الحزبية : علاش ما قامتش الدنيا و قعدت؟ وينهم متع الفساد؟ هاو ما طالب حد بفتح تحقيق؟ زعمة علاش زعمة

تره تخيلو معايا كان جات محادثة بين مصطفى بن جعفر و صحافية، يوعد فيها بمنصب مهم قبل نهاية العام؟ موش راهي ثورة ثورة إلى الأمام إلى الأمام و راهي الدنيا قامت و ما قعدتش؟



نمرو



باهي، زعمة كان الي سمع الصحافية الكلام جاء عماد الدايمي موش الطيب البكوش، زعمة بش تسكت النقابة؟ و شمس فم؟ و نسمة؟ موش رانا مشينا نجريو للبرلمان الأوروبي ضد الدكتاتورية الناشئة و المطالبة بحل رابطة حماية الثورة؟ 



بقية المقاطع ما تهمش الرأي العام، تهم إنتهازيين الي تلمو في حزب الباجي : العركة الموازية متع حارزات الحمام بين مرزوق و البكوش، و الي الحزب فارغ لا كوادر لا تصورات : الشيء الي أي متتبع للشأن العام يعرفو






باهي نجيو لمحاولة الإجابة على السؤال



علاش الي حكاو بالتفصيل على مراسلات حمادي الجبالي من حسابه الشخصي و يشجعو في أنونيموس ولاو توة معادش مع الشفافية و ما يحكيوش على الي خرج في قرصنة مرزوق



 علاش الي في قضية بوشلاكة قالو نخليو الجانب الشخصي على شيرة و نحكيو في الي يهم الشأن العام ما قالوش نفس الشيء في الحالة الموازية هاذي



باهي علاش متع حرية الصحافة و الإعلام و القانون و الفساد و النقابة : حتى كلمة، حتى تعليق؟



الحقيقة ما نعرفش بصفة قطعية، لكن حسب ظني فمة زوز أسباب

الأول : فمة وهم و خرافة كبار متع الشعب التونسي العظيم الي عمل ثورة : غالط موش صحيح، كي تحسب الي خرجو للكياس مع الي تحركو ع الأنترنات حتى لليلة 13 جانفي هوما أقل من واحد بالميا في أحسن التقديرات، الأخرين ؟ لقاو رواحهم يتبعو تبع بعد ما ولد الحفيانة و ولد العريانة قلعو بسنيهم عرش بن علي، لذا كل ما حاجة تنجم ترجعهم وين كانو (سياسيا و طبقيا و ماليا و من ناحية الإمتيازات ) قبل ما تجيهم ثورة وذني هاذي الي لا لوجو لا حبو عليها : هوما مستعدين يساندوها و يجملوها و يدافعو عليها : محسن مرزوق و حزب الباجي

الحاجة الثانية : محسن مرزوق يحكي بالفغنسي الي يعبر خير، يلبس كرافات، يسكن في الأحياء الراقية، لا ناضل لا شد حبس : جماعة الإعلام كيفو بالضبط، يلقاو رواحهم في تصويرته، متاعهم و ولدهم، لذا : طز في الرشوة و الفساد و الصحافة و الحرية، جد عليكم إنتوما زادة؟ توة نقيدو الخنار الي خرج بعد قرصنة مرزوق بحياتو الخاصة و نغموكم الكل و طفي الضو على الأمور العامة الي خرجت

في النهاية : إعلام عار بودورو (المغرب، الآنسة زنطور و صمت بقية وسائل الإعلام كمثال) بعيد عن المهنية و الحيادية، فالح كان في دقان الأحناك، هاو بالكاشف : زعمة صاحبة الجلالة ترقص على وحدة و نص لسياسي مقابل منصب : فضيحة من الحجم الثقيل، كان جينا في أمريكا كلام كيما هذا يطير عليه رئيس و يتحل تحقيق في الرشوة و مجلس تأديب للصحافية من نقابة الصحافيين.. هذاكا كان جاء مرزوق موش في خدمة عودة النظام السابق

هانو المدونة هاذي في حد ذاتها دليل على إنه إنجمو نحكيو في موضوع الموازيغايت منغير الدخول في تفاصيل الناس الشخصية الي نزيد نأكد ما تهم و ما تعني حتى حد و حد ما عندو الحق لا القانوني و لا الأخلاقي باش يذكرها

شكون يتحمل مسؤولية إعلام خرطر و النفاق و أجوندات التجمع : حركة النهضة و فقط حركة النهضة و لا أحد غير حركة النهضة : ويني القوائم السوداء و المحاكمات و من أين لك هذا! بطريقة حكمها النهضة مسؤولة أكثر من الإعلاميين أنفسهم على العار و الدورو الي لاسقين في أغلب (موش الكل لحسن الحظ) الصحافيين و المؤسسات الإعلامية

أه ملاحظة أخيرة : عادي ياخي صحافية محترفة تقول
mon carrière
إش يقريو فيهم في معهد الصحافة؟