mardi 22 janvier 2013

هاو الأساتذة بش يعملو إضراب


 الأساتذة بش يعملو إضراب


على خاطر يحبو المناهج التعليمية تتحسن؟ لا أبدا

على خاطر يحبو مخابر للبحث؟ لا أبدا

إمالة يحبو العطلة تولي شهرين برك موش تلاثة، باش يحسنو مستوى التلامذة الضحل؟ لا لا أبدا

إمالة باش يقضيو على الإيتود منين هب و دب؟ لا يستحيل

إمالة لازم يحبو الإمتحانات تصعاب و تركز أكثر على الفهم و النقد و التحليل؟! لا موش هاذي زادة

إمالة باز خاطر الأقسام معبية و التلميذ ما ينجمش يفهم؟ حتى هاذي لا

أهيا، لقيتها! المكتبات في الليسيات فارغة، و يحبو الدولة تعمل إتفاقيات مع دور النشر باش أخر العناوين تبدى متوفرة للتلامذة؟! لا حتى هاذي لا

تي إمالة على شنوة؟ 

قلك يحبو زيادة في الشهرية
مرة أخرى؟ إيه مرة أخرى و كان تحل فمك تولي رجعي بندير الحكومة ضد العمال

هيا سيدي، هاو إش نقترح : الموظف البسيط كيف يزيد دينار في الشهرية، يدفع منه 350 فرنك ضرائب، الضرائب هذيكا تتبنى بيها السببطارات و تخلص بيها الأساتذة

الأستاذ الي عامل 6 قروبات إيتود، كل قروب فيه 10 من أولاد الموظف البسيط ب40 دينار الراس، ما يدفعش على الدخل هذا حتى فرنك ضرائب! دورو لا! يعني ما يساهمش في بناء السبيطارات و تخليص الأساتذة، يستفاد من مجهود المجموعة الوطنية، أما ربحو ياخذو خام ليه

نقترح تقنين الإيتود، و المراقبة الجبائية ليه، و خطايا جبائية لكل من يتهرب أو يصرح بأقل ملي يدخل، و هكاكة يكونو الأساتذة ساهمو كيف غيرهم في الضرائب ،كيفهم كيف الي يخلص في 400 ألف برك و يقري في صغارو إيتود بالسيف، و وقتها تتنفنف الأمور و نزيدو الأساتذة في الشهرية لا و الله و يفضل باش نزيدو نعمرو مكتبات الليسيات



لا عاد! خدمتهم متعبة! نعم بابا؟ متعبة؟ 18 ساعة في الجمعة 8 شهر في العام متعبة؟ إمالة كان جيت عسكري تضرب بالعامين كونجي لا و جمعة على جمعة تخدم 60 ساعة؟ كان جيت كواش تقوم 5 متع الصباح، و إلا بحار؟ إمالة إش يقول الي يحفر في المنجم؟

لا لا هوما متعبة للأعصاب

متعبة زعمة للأعصاب أكثر من خدمة المهندس الي كان يسهى لحظة طيارة إتطيح؟ من خدمة الطبيب الي كان يفقد تركيزو ثانية إنسان يموت؟ 

تي لا لا! هوما يحضرو كوراتهم! علاه خاطر بالكشي المهندس و المحامي و الكونطابلي ما يروحوش بشكاير خدم للدار و ما عندهمش جوان و جويلية و أوت

كان الدلال الفارغ، شكون ضربك على يدك قلك ولي أستاذ؟ تي ماك تجري و تجري و تعاود سنين في الكاباس و فمة شكون دفع الرشوة جملة! توة ولات خايبة؟ مرهقة؟ الشهرية شوية؟ ما في بالكش بيها م الأول محسوب

نعطيكم وذني نهار الي نشوفكم محروقين هابلين هايجين على المكتبات الفارغة، على المستوى الضحل للتلامذة، نهارة الي نراكم الساعة تدفعو في الضرائب على فلوس الإيتود، وقتها، كي تكونو أديتو واجبكم للمجموعة الوطنية من حقكم تطالبو المجموعة الوطنية بالزيادة، موش قبل


 أه سامحوني! ما يحبوش زيادة في الشهرية! أما زيادة في المنحة : الحاج موسى، موسى الحاج

أه شوف الطبيب! درجين ب40 دينار! علاه قاري قده إنت؟

الآخر قلك نحبو روترات بكري؟! معناها مع جوان و جويلية و أوت، يحب المجموعة الوطنية تبدا تصرف عليه على بكري! و العسكري إمالة وقتاه ياخو الرترات؟ و الي يحفر في المنجم! باهي سيدي ماك كي تجري و تجري باش تولي بروف في بالك بالرترات وقتاش



لا قلك، ما تعرفش علاش تحكي! خاطر هوما يعرفو الفرملي إش يعاني و العسكري إش يقاسي و البحار كيفاه عايش! و الكلهم يدفعو في الضرائب  و ما عندهمش جوان و جويلية و أوت


شوف نواب التأسيسي قداه يخلصو و مستخسر فينا زوز صوردي؟ الحل نصدمو على المجلس التأسيسي نهدوه على روسهم، موش نزيدوكم إنتوما

كيلو الفلفل ب1700 و ما تحبناش نتزادو؟ كيلو الفلفل ب1700 على الي يخلص في 400 دينار برك و يدفع في ضرايبه و يقري في أولاده إيتود، و الزيادة لعشرات آلاف الأساتذة من غير زيادة مقابلة في الإنتاج تعمل التضخم، و يولي كيلو الفلفل ب2500 و يقعد الموظف  يخلص في 400 دينار برك و يدفع في ضرايبه و يقري في أولاده إيتود

شكون قراك و ردك تقرى و تكتب! شوف هاك اللوغة! متطوع بالكشي! ماهو يخلص، و عاد هكاكة شكون داواك و شكون بنالك الكياس، لا خدمة إنجمو نعيشو بلاش بيها و لا واحد يخدم بلاش

أدي واجبك نحو المجموعة الوطنية و بعد طالبها، موش المجموعة الوطنية توة على ركايبها : توة نحلبها و بعد ما تشيح نذبحها و نسلخها

و بالطبيعة، النهار الي ما يخدموش فيه.. يخلصو فيه.. من ضرائب الي يدفع فيها الموظف الي  يخلص في 400 دينار برك و يدفع في ضرايبه و يقري في أولاده إيتود

كلامي موجه للأساتذة المواسونوز باتوز متع مصان فلوس الإيتود، الكلنا قابلنا منهم عرفنا منهم، كيما عرفنا زادة الأستاذ الي يترفع عن إنه يبيع العلم، يغزرلو رسالة موش سلعة و يعدي السوايع بعد الوقت يفهم و يوري، جائزته إنك تفهم، موش راس الشهر يبدا يتشوحر : ويني فلوس الإيتود

dimanche 13 janvier 2013

عندما ترقص صاحبة الجلالة للسياسي : محسن مرزوق كمثال



أول حاجة نحب نبدا بيها الي مانيش بش نتناول الموضوع من ناحية أخلاقية و أخلاقاوية : حد ماهو حارس على أخلاق حد، ماناش بش نضربو بالحجر : الكلنا ديارنا بلار و زيد كيما قال السيد المسيح :مَنْ كَانَ مِنْكُمْ بِلاَ خَطِيئَةٍ فَلْيَرْمِهَا أَوَّلاً بِحَجَر

لكن زادة الغمة لا! موش خاطر فيها تفاصيل شخصية إنطفيو الضو علي فيها الكل! لا سيدي! هاذي إسمها غمة : بعض ملي جاء في المراسلات المقرصنة بين محسن مرزوق و الصحفية بجريدة المغرب كوثر زنطور  يهم الرأي العام،  يهم الناس الكل: علاقة السياسة و الأحزاب بالإعلام موضوع يهمنا الكل

نحب نأكد زادة الي أنا ضد القرصنة مهما كان نوعها، لكن لما نشوف قرصنة الجبالي كيفاه تداولها الجميع، نقول أنا ضد القرصنة، لكن القرصنة إذا صارت ما نتغاضاوش علي يهم الشأن العام في كل ما يكتشف و فقط الي يهم الرأي العام

محسن مرزوق بعد إسترزاقو من  من البترودولار الوهابي متع مراكز دراسات الشيخة موزة، و بعد العمل الجبار كرئيس منظمة العمالة فريدم هاوس في تونس، و مطالبته للسفير الأمريكي بضمان المقربين لبن علي و مهاتفته لصحافيي الجزيرة نهار 14 جانفي قائلا :"لازم بن علي يبقى" هو اليوم قيادي و مؤسس في حزب نداء تونس : يعني شخصية عامة و آرائه تهم الرأي العام

فقط نستحضر صورة موازية : دومينيك شتروسكان ما كانش في الحكومة وقت وسائل الإعلام تناولت الفضيحة متاعو، كان في المعارضة : السياسي رجل عام مهما كان موقعه

كيفاش العبد الفقير سمعت بالفضيحة؟ نلقا أرتيكل كاتبو اللحاس الرخيص (نسبة بقداش كان يلحس مقارنة بأندادو) نزار بهلول ينفي فيه الفضيحة و يلحس لمرزوق: قلت إمالة باز صحيحة، عاد قمت نلوج



آخر نقطة في المقدمة الطويلة هاذي : قبل ما ننشر هالتدوينة هاذي ثبتت الي المحادثة صحيحة و موش مفبركة
 كيفاش؟ 
على يسار المحادثة فما أصدقاء أخرين للصحافية، إتصلت ببعضهم و أكدولي الي الحساب المقرصن صحيح، هاو مرزوق يهدد باش يرفع قضية موازية علي زعمة فبركو المحادثات


  أنا لا قرصنت لا هبطت لا فبركت لا نبارك في يوم م الأيام حاجة هكة ، لكن إذا شكى بواحد زعمة خاطر فبركة (لن يفعل و هو كاذب كيف يقول إنه موش حسابه لكن حساب فايسبوك موازي) نكون سعيد باش نعطيه التأكيدات

باهي نجيو للمقاطع الي تهمنا، في حديث الشخصيتين العامتين الي يحكيو فيه على الشأن العام محسن مرزوق و كوثر زنطور

 الصورة الأولى 



إش معناها صحافي يعطي تحقيقه قبل صدوره لرجل سياسة؟ بأنا حق محسن مرزوق يتسائل علاش تهاجم فيه؟! هذه حرية الصحافة؟ هذه حرية الإعلام؟ لا و الي يعجبك، الصحافية تبرر في موقفها

تره تخيلو كان جاء في بلاصة محسن مرزوق مثلا لطفي زيتون: صحافية تحكيلو بالمسبق على إش بش تهبط و هو متغشش من صحافية كيفاه تهاجم في حزبو : راهي نقابة الصحافيين قلبت الدنيا و حصة خاصة في لاباس و ملف كامل في نسمة و الفايسبوك شعل و المقيم العام أعرب عن بالغ قلقه و السفارة الأمريكانية عن بالغ إنشغالها و إتحاد الشغل عمل إضراب و راهي خرجت مسيرة ضد رابطة حماية الثورة (إش مدخل رابطة حماية الثورة؟ ما عندها حتى دخل أما برة بركة ميسالش، راس الهم دادة عيشة) : علاش هذا الكل ما صارش؟ آخر الأرتيكل نقوللكم

نواصلو



في المقطع هاذا، محسن مرزوق يفسرلها علاش ما يلزمهاش تعمل هكة، و إلي الشيء هذا يضر بحزبه! بكل وقاحة، معناها هاك الكلام الكبير متع الحياد و الموضوعية و النزاهة طلع الكله خر طر، لا ساس لا راس لا ذات لا صيفات! محسن مرزوق بكل وقاحة يطلب من صحفية تخدم مصالحه الحزبية الضيقة الموازية ضد حزب آخر، موش تخدم الحقيقة و المعلومة! عادي ملي متربي في مدارس فريدم هاوس

تتخيلو كان جاء قيادي في النهضة يؤمر صحافية إنها تخدم حزبو على حساب نداء تونس إش كان يصير؟

نشوفو راي الصحفية : حزب تونس حزب إفتراضي، فقاعة إعلامية : لا برامج لا تصورات لا أفكار، فقط تجمع زعمة زعمة دستوري لاعبها ديمقراطي حول الباجي : هاذي قناعتها الشخصية

تره براو أقراو كتاباتها على الحزب و شوفو اليوم في إعلامنا قداش الصحافيين مهنيين و ما يكتبو كان الي مقتنعين بيه، هاو قناعتها العميقة تقولها من غير روتوش لقيادي في الحزب



قارنوها بإش تكتب للرأي العام


نتعداو



هانا نشوفو رأي القيادي في حزب نداء تونس في جريدة المغرب، يغني عن كل تعليق، إن شاء الله برك منخرطين حزبه يفهمو الي هي فقط جربدة موازية، أتعس من جرايد شفيق جراية

فقط نرد على الآنسة : تي هاي طلعت في آخر حلقة أتعس من جريدة الحرية : صحافيين تحت الطلب يكتبو عكس قناعاتهم خدمة لأشخاص في أحزاب سياسية

زعمة كان جاء الصحبي عتيق الي قال الكلام هذا، حتى في مراسلة خاصة على جريدة المغرب، موش راهو عمر صحابو ضرب وحده 3 ميدي شو باش يحكي على محاولة إندرى شكون على الهيمنة و إسكات الجريدة الحرة المناظلة متاعو؟

نواصلو



هيا تخيلو معايا كان صحافية من التلفزة الوطنية تصرح لمسؤول في النهضة :" أنا نحب برشة سي راشد و النهضة و ربي معاه"، قاعدين تتخيلو ماهو في نقابة الصحافيين و الفايسبوك و لاباس و القلابس و ميدي شو؟ تتخيلو في الدروس و الوعظ  و الإرشاد و إستقلالية الإعلام و تركيعه و رابطة حماية الثورة؟

و زيد هاو شهد شاهد من أهلها! هاي الآنسة زنطور الي تحب الباجي و تعاون فيه : نداء تونس الكله إنتهازيين! كان قالها عبد الرؤوف العيادي راهي الدنيا تشقت

نزيدو



يظهرلي موقف مرزوق ما يستحق حتى تعليق موازي : الي يهمه موش الخير لتونس، لكن الشر للنهضة، كرهه للنهضة أقوى من حبه لتونس



نزيدو نواصلو



تعريف الرشوة قانونا: القانون عدد 33 المؤرخ في 23/05/1998: كل شخص انسحبت عليه صفة الموظف العمومي أو شبهه وفق هذا القانون ويقبل لنفسه أو لغيره بدون حق سواء بصفة مباشرة أو غير مباشرة عطايا أو وعود ا بالعطايا أو هدايا أو منافع كيفما كانت طبيعتها لفعل أمر من علائق  وظيفته ولو كان حقا لكن لا يستوجب مقابلا عليه أو لتسهيل انجاز أمر مرتبط بخصائص وظيفته أو الامتناع عن انجاز أمر كان من الواجب القيام به يعاقب لمدة 10 أعوام وبخطية قدرها ضعف قيمة الأشياء التي قبلها أو ما تم الوعد به على أن لا تقل الخطية عن عشرة آلاف دينارا

 كما أن المشرع طال أصحاب النفوذ وأفعالهم المكونة لجريمة استغلال النفوذ
 Trafic d’influence 
 وهي جريمة أوسع مدلولا  لا تقتصرعلى الفعل المحصور من موظف عمومي ليطال أشخاصا آخرين لهم مراكز اجتماعية متقدمة في القطاع الخاص 

 الأركان القانونية لهذه الجريمة 

تتعلق بصفة الجاني إذ يجب أن يكون موظفا عاما أو شبهه

 يتعلق بالركن المادي وتتمثل في طلب الموظف أو شبهه لنفسه أو لغيره أو قبوله أو أخذه وعدا أو عطية أو منفعة

 يتعلق بالركن المعنوي ويتخذ صورة القصد الجنائي إذ لا تقع جريمة الرشوة إلا عمدا

 ان الركن المادي للجريمة والمتعلق بالوعد أو العطاء هو الذي عادة ما يسير على البحث والإمعان لدى فقه القضاء وشراح القانون

ذلك أن عادة ما يحصل الاتفاق أو التعاقد بين الراشي والموظف المرتشي على صورة معينة للرشوة كان يكون وعدا لتقديم شيء ما أو إعطاء هدية أو امتياز ما ويقبل ذلك الموظف أو شبهه بالعرض المذكور  وبناء على ذلك تتحقق جريمة الرشوة

بيد انه لا بد من التذكير من أن الجريمة تعد قائمة قانونا ولولم يتسلم المرتشي فعلا الشيء المقابل المتفق عليه  بل لمجرد الاتفاق والتعاقد الذي يتم بين الراشي والمرتشي 

 http://shr.tn/rtn1 المصدر 


هذا ما يقوله القانون التونسي، وينهم متع الفساد؟ متع طبق القانون! مانيش خبير قانوني لكن جريمة الرشوة تبدولي مكتملة الأركان : وعد بمنصب مهم قبل نهاية العام مقابل نقل الأخبار، الكتابة حسب الطلب و الخدمات الحزبية : علاش ما قامتش الدنيا و قعدت؟ وينهم متع الفساد؟ هاو ما طالب حد بفتح تحقيق؟ زعمة علاش زعمة

تره تخيلو معايا كان جات محادثة بين مصطفى بن جعفر و صحافية، يوعد فيها بمنصب مهم قبل نهاية العام؟ موش راهي ثورة ثورة إلى الأمام إلى الأمام و راهي الدنيا قامت و ما قعدتش؟



نمرو



باهي، زعمة كان الي سمع الصحافية الكلام جاء عماد الدايمي موش الطيب البكوش، زعمة بش تسكت النقابة؟ و شمس فم؟ و نسمة؟ موش رانا مشينا نجريو للبرلمان الأوروبي ضد الدكتاتورية الناشئة و المطالبة بحل رابطة حماية الثورة؟ 



بقية المقاطع ما تهمش الرأي العام، تهم إنتهازيين الي تلمو في حزب الباجي : العركة الموازية متع حارزات الحمام بين مرزوق و البكوش، و الي الحزب فارغ لا كوادر لا تصورات : الشيء الي أي متتبع للشأن العام يعرفو






باهي نجيو لمحاولة الإجابة على السؤال



علاش الي حكاو بالتفصيل على مراسلات حمادي الجبالي من حسابه الشخصي و يشجعو في أنونيموس ولاو توة معادش مع الشفافية و ما يحكيوش على الي خرج في قرصنة مرزوق



 علاش الي في قضية بوشلاكة قالو نخليو الجانب الشخصي على شيرة و نحكيو في الي يهم الشأن العام ما قالوش نفس الشيء في الحالة الموازية هاذي



باهي علاش متع حرية الصحافة و الإعلام و القانون و الفساد و النقابة : حتى كلمة، حتى تعليق؟



الحقيقة ما نعرفش بصفة قطعية، لكن حسب ظني فمة زوز أسباب

الأول : فمة وهم و خرافة كبار متع الشعب التونسي العظيم الي عمل ثورة : غالط موش صحيح، كي تحسب الي خرجو للكياس مع الي تحركو ع الأنترنات حتى لليلة 13 جانفي هوما أقل من واحد بالميا في أحسن التقديرات، الأخرين ؟ لقاو رواحهم يتبعو تبع بعد ما ولد الحفيانة و ولد العريانة قلعو بسنيهم عرش بن علي، لذا كل ما حاجة تنجم ترجعهم وين كانو (سياسيا و طبقيا و ماليا و من ناحية الإمتيازات ) قبل ما تجيهم ثورة وذني هاذي الي لا لوجو لا حبو عليها : هوما مستعدين يساندوها و يجملوها و يدافعو عليها : محسن مرزوق و حزب الباجي

الحاجة الثانية : محسن مرزوق يحكي بالفغنسي الي يعبر خير، يلبس كرافات، يسكن في الأحياء الراقية، لا ناضل لا شد حبس : جماعة الإعلام كيفو بالضبط، يلقاو رواحهم في تصويرته، متاعهم و ولدهم، لذا : طز في الرشوة و الفساد و الصحافة و الحرية، جد عليكم إنتوما زادة؟ توة نقيدو الخنار الي خرج بعد قرصنة مرزوق بحياتو الخاصة و نغموكم الكل و طفي الضو على الأمور العامة الي خرجت

في النهاية : إعلام عار بودورو (المغرب، الآنسة زنطور و صمت بقية وسائل الإعلام كمثال) بعيد عن المهنية و الحيادية، فالح كان في دقان الأحناك، هاو بالكاشف : زعمة صاحبة الجلالة ترقص على وحدة و نص لسياسي مقابل منصب : فضيحة من الحجم الثقيل، كان جينا في أمريكا كلام كيما هذا يطير عليه رئيس و يتحل تحقيق في الرشوة و مجلس تأديب للصحافية من نقابة الصحافيين.. هذاكا كان جاء مرزوق موش في خدمة عودة النظام السابق

هانو المدونة هاذي في حد ذاتها دليل على إنه إنجمو نحكيو في موضوع الموازيغايت منغير الدخول في تفاصيل الناس الشخصية الي نزيد نأكد ما تهم و ما تعني حتى حد و حد ما عندو الحق لا القانوني و لا الأخلاقي باش يذكرها

شكون يتحمل مسؤولية إعلام خرطر و النفاق و أجوندات التجمع : حركة النهضة و فقط حركة النهضة و لا أحد غير حركة النهضة : ويني القوائم السوداء و المحاكمات و من أين لك هذا! بطريقة حكمها النهضة مسؤولة أكثر من الإعلاميين أنفسهم على العار و الدورو الي لاسقين في أغلب (موش الكل لحسن الحظ) الصحافيين و المؤسسات الإعلامية

أه ملاحظة أخيرة : عادي ياخي صحافية محترفة تقول
mon carrière
إش يقريو فيهم في معهد الصحافة؟