105 minutes avec un ex-ministre : Mr Mohamed ABBOU

رسالة للمؤتمر : تخيلو

اليوم نخمم، تره زعمة كان المنصف المرزوقي يتقدم بمشروع قانون للمجلس التأسيسي، لتنقيح القانون المنظم للسلط،  مشروع يوسع من صلوحياتو و يزيدها فتح أرشيفات البنك المركزي، أرشيفات الداخلية، التعيينات في قطاع الإعلام، و بما إنه القائد الأعلى للقوات المسلحة يولي تعيين و عزل وزير الدفاع من صلوحياتو زادة

في نفس الوقت، شباب المؤتمر يقلب الطرح على الإنتهازيين و التجمعيين و يعمل طرح 

تطهير و يثور على الي دخلو خاصة بعد الإنتخابات و يفرض إعادة هيكلة

المشروع يتطرح قدام المجلس، كتلة المؤتمر تساندو

المعارضة بش تلقى روحها قدام خيارين

الخيار الأول تساند القانون و يتعدى، كان النهضة تصوت ضد، أما المعارضة تنجم ترفض خوفا على مصالحها المادية : المعارضة عمرها ما قلقها إلي الحكومة ما طهرتش، عمرها ما طلبت بطريقة جدية فتح الأرشيف

الخيار الثاني تلقى سبة تتعلل بيها و ترفض القرار، وقتها تخسر تعاطف العديد العديد من الأنصار، لأنه الرفض يعني الإنبطاح للنهضة و فتح طريق الدكتاتورية

في الحالتين المرزوقي و المؤتمر يربحو

نتصور المعارضة تقبل القرار و يتعدى

الترويكا هكة تتزعزع؟ علاه توة يجي بن عمر يعتذر حتى هو و يقول القرار ما فيه حتى   مس من رئاسة الحكومة

النهضة بش تتغشش و تغلي و تزبد : توة بلبزتها مع العريضة و بلاش المؤتمر إتطيح الحكومة و ما عندها مع شكون تتحالف، زيد شباب التكتل يغلي على النهضة إلي حاسبتهم رقاصة و على بن جعفر الي أعطيه لوغة هو و بعد الطوفان

و زيد المرزوقي بالظربة هاذي، داخل في الربح خارج من الخسارة : كان تعدى القانون : يديه تحلت و ينجم ياخذ قرارات ثورية و يعطي دفع للمؤتمر و يخرجو كقوة سياسية ثورية و بديلة تكسر الإستقطاب نهضة السبسي، و كان ترفض القرار و حسب التصويت يقلب القسمة : شكون يحب التطهير و شكون يحب الثورة المضادة و يخلي الشارع يحسب حسابو و يعرف شكون يحب  يغير الأمور و شكون يفلم

نتخيلو القرار تعدى، تتالى بعدو القرارات

عزل وزير الدفاع و رشيد عمار : الزوز أعلنو العصيان و حطو الراس ع الراس مع الجبالي : البغدادي يخرج من نقطة عسكرية و القائد الأعلى للقوات المسلحة ما يسمعش و هوما الزوز معاه في الطيارة و ما يقولولوش؟ و زيد القانون يمنع إنه نفس الشخص يكون في نفس الوقت رئيس أركان جيش البر و رئيس أركان الجيوش الثلاثة و رشيد عمار خايف يرعش كان يعطي لواحد آخر رئيس أركان جيش البر تتكشف الكوارت..أما رشيد عمار فوق القانون.. كل القانون

ترفع حالة الطوارء 

 فتح أرشيفات الداخلية : القوادة و العساسة و السياسيين و البنادرية و البوليس السياسي و القضاة و الإعلاميين : ينقص التفليم و يبان شكون نظيف و شكون كلب و تتصفى الأمور و يتقلب الطرح

- فتح ملفات البنك المركزي : الي خذا قروضات و ما رجعش، و الي هرب عملة : الكلها تمشي تبحث و تقص مع سياسة النهضة : من دخل بيت أبي سفيان فهو آمن

- تعيينات ثورية في  قطاع الإعلام تقلب الطرح على الناس الكل

تره نشوفو المرزوقي كي يتجرأ إش يربح و إش يخسر؟

الخسارة معاد عندو ما يخسر، حياتو السياسية وفات، التشليك و تشلك، الترويكا قعدت كان وهم في خيالو! حتى شيء ما عندو ما يخسر

أما خممو إش عندو يربح.. تخيلو للحظة.. فقط للحظة، إش نربحو الكل

المشكل وين : المرزوقي ما عادش عندو وزن في المؤتمر، الناس الكل ولات نفسي نفسي و كل واحد عندو حساباتو على حساب الحزب، زيد المرزوقي مزال قاري النقص في روحو و ما فهمش إلي النهضة حاشتها بيه قد ما هو حاشتو بيها  و بلاش المؤتمر ما تنجم تعمل شيء، و زيد ما حبش يفهم إلي الترويكا وهم و إلي المسار الثوري أهم من الصورة  للخارج متع حزب ديني ينجم يخدم مع حزب لاييكي

الأمر ممكن، و المحاولة ممكنة، من واجب المؤتمرين و عندهم فرصة بشبابهم باش يكسرو حلقة التجمع بشقيه : نهضة و سبسي

هل ثمة ما يكفي من الجرأة السياسية و حب الوطن و الإبداع السياسي للتقدم؟ للثورة؟ من الخيانة على الأقل عدم المحاولة

ياسين العياري -مواطن تونسي-

كمال النابلي : أسرار الإقالة

بالله سؤال لبعض المتحسرين على كمال النابلي، ياخي تعرفوه؟ 

هيا سيدي نحكيلكم عليه شوية

رصيده النظالي : بعد ما كان وزير عند بن علي حضر طهور ولد نسيبو كمال اللطيف، تغشش عليه الزعبع هرب لأمريكا، نتحدى أي واحد يلقالي ربع كلمة و إلا موقف خذاه حتى بتفدليك ضد العصابة

بعد الثورة

عمل قوائم وهمية لرجال أعمال مجمدة أموالهم، هكاكة من راسو، بالعين عملها و يزيد و ينقص منها من غير إذن قضائي و الي يحب يتنحى إسمو يمشي يعمل قهيوة بحذا نسيبو

عارض فتح أرشيفات البنك المركزي و تطهيرو

وافق على إعطاء صخر الماطري و ثيقة تمكنو من إمتيازات زعمة مقيم في الخارج

وافق على إنه تونس تدفع ديونها بصفة إستباقية قبل ب6 أشهر من موعدها و خلى الكاسة فارغة و رصات في قروضات

وافق على الزيادات في الشهرية الي قررها الباجي الكل منغير زيادة إنتاج : غرقنا في أنفلاسيون 

قبل الإنتخابات : كان موعود ببلاصة، نهيرين قبل الإنتخابات جاء في الرديون و أعطى أرقام على الوضع الإقتصادي غارو منها في السويد

بعد الإنتخابات : ما صحتش البلاصة، جمعة بعد الإنتخابات عطى أرقام كارثية على الإقتصاد هربت المستثمرين و نشرت الفزع و تبين من بعد إنها غالطة

وزيد كونه نسيب كمال اللطيف و قربه المعلن من الباجي ينحي عليه الحيادية اللازمة باش يتقلد المنصب : البنك المركزي موش لعبة يستعملوها باش يمركيو بيه بونطوات سياسية لبعضهم

لذا، أنا كفائة و أنا ريق؟ و تونس قايمة على شخص هي؟ نحسبوه حرق للطليان سي النابلي، نسكروه البنك المركزي؟

لا أما مدام المرزوقي نحاه، يولي بالعسل، خاطر إش يهمنا في البلاد و الإقتصاد و البنك المركزي، المهم نضحكو على المرزوقي

من جهة أخرى الكفائة عمرها ما كانت كافية وحدها، إنه الولاء يكون لتونس فقط أمر 
لازم و إجباري

منيش نخون في النابلي، أما علاقتو مع البنك الدولي و واشنطن يعرفها القاصي و الداني و ما هيش سر

تأثرو بسياسات البنك الدولي الي عمرو ما كان صديق للشعوب يجعل منه خطر على مستقبل أولادنا : أعملو طلة على الرائد الرسمي أيامات السبسي توة تشوفو قداش تبحبحنا في الديون. وقت خلاصها لا السبسي لا النابلي بش يكونو هنا أما ولدي و ولدك إيه 



علاقتو بالبنك الدولي  و كونه في نفس الوقت محافظ البنك المركزي هي بكل بساطة : تخلويض! مصلحة تونس عمرها ما كانت مصلحة البنك الدولي، مستحيل ينجم يوفق بين مصالح تونس و مصالح أصحابو في البنك الدولي، و كي نشوف القروض الي سددها قبل أجلها و القروض الجديدة الي تخذات في عهدو، واضح مصلحة شكون خدم

تتفكرو إش جاوب كمال النابلي وقت الي سؤلوه على التدقيق في الديون قبل سدادها؟ قال ما نفهمش إش معناها تدقيق في الديون! يحب ولدي و ولدك يخلصو من لحمهم حق كافيار ليلى بن علي! ما يفهمش شمعناها تدقيق قال

المرزوقي رفض تصحيح قوانين تخليص البنك الدولي قبل ما يوفى التدقيق، و هذاكا 
سبب العركة و الحملة الي على المرزوقي

 نحكيو شوية ع التاريخ 

البنك المركزي التونسي تأسس عام 1958، كرمز للسيادة الوطنية ضد الاستعمار، لكن المؤسسة المالية تحولت  في ظل حكم بن علي إلى الذراع المسلحة للإمبريالية، إلى آلية 
دمار شامل ضد تونس


وقت الي بن علي و البنك الدولي ينهبو في تونس، شكون الي لاهي بالشرق الأوسط و شمال إفريقيا في البنك الدولي شكون لاهي بملف تونس و ببن علي؟ شكون؟ براااافو : سي كمال النابلي شخصيا


  الي موش مصدقين و زعمة تصدمو ينجمو يثبتو على صفحة ويكيبديا متاع كمال 


http://fr.wikipedia.org/wiki/Mustapha_Kamel_Nabli

 كي تمكنت الثورة من طرد الدكتاتور، استولت الدوائر المالية الامبريالية على المؤسسة ،ستعملتها كسلاح ضدّ الثورة،  تم تنصيب كمال النابلي أحد كبار موظفي البنك في واشنطن على رأس البنك، منذ يوم 17 جانفي ، على رغم الانتخابات التي أزاحت من السلطة كل الطاقم السابق،  السيد قعد : صاحب البنك الدولي شكون يمسو

 قوى الثورة المضادة تعرف مليح  القيمة الاستراتيجية لمعركة المديونية، هذاكا علاش قعدت تدز في الحكومات المتعاقبة بعد الثورة باش يزيدو يتداينو

يقول جون أدامس، الرئيس الثاني للولايات المتحدة الامريكية: «هناك طريقتان لغزو أمة ما وإخضاعها: الاولى بواسطة السيف، والثانية بواسطة الديون». وهذا يؤكدو تاريخ تونس، المديونية في  القرن تسعطاش هي الي فرضت الاستعمار ،  و الي زاد تأكد في تجربة نصف القرن الأخير خاصة بعد بداية الثورة

 جون زيغلار، صديق الثورة التونسية يقول :لم تعد هناك حاجة إلى رشاشات ونابالم ومدرعات لاستعباد الشعوب ولإخضاعها، فالمديونية تضمن ذلك اليوم

أخطانا من التاريخ، نجيو للأرقام 

سي الكفؤ، وصل البلاد لاقل نسبة نمو اقتصادي في تاريخ تونس نزلت تحت كل التوقعات و بلغت نسبة سلبية -2% في 2011 بعد ما كانت 4% في 2010 و وصل البلاد لمليون بطال لحد اواخر 2011 بعد ما كانو 400 ألف في اواخر 2010 طيلة عام و نصف من تحمله للمسوولية ، شوفو قداش طاح الدينار، ما جاب حتى فرنك من فلوس التونسيين المهربة عدا عن حمايته للفساد و الفاسدين بعدم فتحو لأرشيفات البنك المركزي. موش مسؤولتيو هذا الكل؟ إمالة مسؤولية شكون؟

أه حقة قلك المرزوقي طردو باش يرجع فازة تسليم البغدادي : غالط موش صحيح. في ماي 2012 يعني قبل حكاية البغدادي خرجت

 Maghreb Confidentiel

 الي الحكومة تلوج على بديل للنابلي و الكلام الي على الفايسبوك زعمة ترجيع فازة ع البغدادي ما ليه حتى معنى. بعدها النابلي تبورب على المرزوقي، في بالو البنك الدولي باش يحميه، ياخي المرزوقي طلب تدقيق في الديون، ما صححش على القانون الي حب عليه البنك الدولي و زاد كمل أعطاه سفساري و وصلو لباب عليوة

باهي إمالة علاه ما نجم يتعدى قرار الإقالة كان توة؟ 
لاحمة بين النهضة و المرزوقي ، المرزوقي حب يوقف إستعمار البنك الدولي، النهضة خايفة و حاشتها بسيولة مهما كان الثمن،  النابلي هو رجل البنك الدولي ، الي حاميه البنك الدولي، فرغم قربه من كمال اللطيف و الباجي النهضة خايفة ترعش منه و من عروفاتو في البنك الدولي
بعد حكاية البغدادي المرزوقي ماعاد عندو ما يخسر و هدد بالي نواب المؤتمر يصححو في حجب الثقة على الحكومة و تطيح
النهضة تحصرت و وافقت، و طار النابلي، رغم ذلك إمكانية تصويت نواب النهضة ضد الإقالة يقعد وارد

إيه و إستقلال البنك المركزي؟ ياخي النابلي إسم الدلع متاعو 'إستقلال'؟ إنجمو نعملو إستقلال البنك من غير النابلي، تونس ما تاقف على حد

تي لا عاد، ماهو خذا جايزة متاع أحسن محافظ بنك مركزي في إفريقيا! بصراحة كي ريتو خذا الجايزة فهمت علاش إفريقيا هي أفقر قارة في العالم، و زدت تفكرت الجوائز الي كانت تاخذ فيهم الدكتورة ليلى، و صدقت الي هي صدفة الي خذا الجايزة وقت الي فاح خبر إقالتو و كي عملت طلة على "لجنة التحكيم" و شفت شكون التوانسة الي فيها و علاقتهم الطيبة ببعض الأشخاص،  و الي البانكة التونسية البيات من الممولين و الراعين للجائزة فهمت كل شيء

فبحيث، تنحية النابلي قرار سياسي سيادي إقتصادي حكيم، لكن يقعد ناقص إذا ما تتحلش أرشيفات البنك المركزي : شكون نهب، شكون خذا قروض و ما رجعش، شكون خرج  عملة، و من بعدها يقع ضمان إستقلاليتو دستوريا و رقابتو برلمانيا

هل إنتهى سراب الترويكا؟ خربشات حول تسليم البغدادي

البغدادي المحمودي و تسليمه، هل هي نهاية وهم؟

البغدادي المحمودي بريء إلى أن تثبت إدانته في محاكمة عادلة تتوفر فيها كل شروط و   

  ظمانات الدفاع و في نفس الوقت  تسليم البغدادي واجب و حق الليبيين أول ما تتوفر ضمانات  محاكمة عادلة تتوفر فيها كل شروط و ظمانات الدفاع

في تقديري طريقة و توقيت عملية التسليم بها سبعة  أخطاء

خطأ قانوني : القانون المنظم للسلط لا يعطي بطريقة واضحة لرئيس الجمهورية صلوحية منع أو مباركة التسليم و لكن في نفس الوقت لا يعطي هذه الصلوحية للوزير الأول! عدم وضوح النص يحيلنا آليا للفصل 313 من المجلة الجزائية الذي يشترط مرسوم من  الرئيس  ليتم تفعيل التسليم

من جهة أخرى

الفصل 324 من مجلة الاجراءات الجزائية: "وإذا لم يتسلم أعوان الدولة الطالبة الشخص المطلوب تسليمه في ظرف شهر من تاريخ الإعلام بأمر التسليم فإنه يخلى سبيله ولا يمكن بعدئذ طلب تسليمه لأجل السبب نفسه"

فعملية التسليم إذا غير قانونية حتى شكلا

نواصل : إتفاقية جنيف 1951 الخاصة باللاجئين الذي وقعت عليها تونس تقول أنه لا يمكن تسليم طالبي اللجوء ما لم يتم النظر و رفض مطلبه في اللجوء. البغدادي تقدم بطلب لجوء و لم يتم النظر فيه بعد.

أيضا، القانون المنظم للسلط العمومية يقول أن السياسة الخارجية ترسم بالتوافق بين رئيس الجمهورية و رئيس الحكومة، و تصريحات الناطق الرسمي للرئاسة تثبت أن هذا التوافق لم يحصل

خرق للمجلة الجزائية، للإتفاقات الدولية و للقانون المنظم للسلط العمومية! لم يبقو إلا على قانون الطرقات حسب تقديري

ما قامت به الحكومة، و من ناحية قانونية  هو إذا تهريب اشخاص عبر الحدود بدون اتباع الاجراءات القانونية 

خطأ سياسي : إهانة مؤسسة الرئاسة هي ضربة قاصمة لمفهوم المؤسسة ! رئيس حكومة يفعل ما يريد كما يريد في إستهزاء كامل بالقانون و دور و ثقل المؤسسات.

الخطأ السياسي هو أيضا  في إحتقار حركة النهضة ممثلة في حمادي الجبالي لشركائها : حزبي التكتل و المؤتمر. هل نسيت النهضة أنها لا تملك أغلبية مقاعد تمكنها من الحكم وحدها؟ هل مازالت تهدد بورقة العريضة الشعبية؟ م الذي يعطي النهضة هذه القوة على إهانة حزبين معها في نفس الكتلة لم تكلف نفسها حتى عناء إعلامهم؟

هذا الخطأ السياسي قد يقلب المعادلة و قد يدفع نواب التكتل و المؤتمر لسحب الثقة عن حكومة النهضة، فقد إنكشف الغطاء : النهضة تحكم لمفردها و لم تراع المظاهر حتى مجاملة، فلماذا سيراعي نواب التكتل و المؤتمر كتلة يدفعون ثمنها غاليا و هم منسيون من ريعها؟

-خطأ في التواصل : عندما يصرح سمير ديلو أن تسليم البغدادي سيسهل تسليم بن علي هو سب لذكاء الونسيين و إستخفاف بعقولهم : حمادي الجبالي لم يطالب بتسليم بن علي حتى و تسليم البغدادي ليست له علاقة لا من بعيد لا من قريب بتسليم بن علي. هذا التعليل السخيف يضهر الحكومة في شكل الدجال المتخبط الذي يقدم عذرا أقبح من ذنب.

-خطأ إستراتيجي : تعدي رئيس الحكومة على القانون و الإتفاقيات الدولية يعطي صورة سيئة جدا عن تونس : الحكومة المنتخبة لا تحترم القانون، لا تحترم إتفاقياتها.

 كم أيضا من القوانين ستزدريها هذه الحكومة؟ هل بناء الديمقراطية و زرع الثقة في الداخل و الخارج يتم بخرق القانون؟ و إذا خرقنا هذا القانون اليوم فنحن فتحنا بابا هي فقط مسئلة وقت لتعود منه الديكتاتورية. 

-خطأ أخلاقي : عندما تقوم حكومة ثورة قائمة على الكرامة بتسليم مطلوب (بريء إلى أن تثبت إدانته) دون توفير شروط حفظ كرامته بعد تسليمه; عندما تقوم حكومة ثورة قامت لأجل رد إعتبار الإنسان ببيع لاجئ في سوق النخاسة، فتلك وصمة عار لتونس تاريخا و حكومة و شعبا. 

-خطأ ديني : قال عز وجل: وَإِنْ أَحَدٌ مِنَ الْمُشْرِكِينَ اسْتَجَارَكَ فَأَجِرْهُ حَتَّى يَسْمَعَ كَلامَ اللَّهِ ثُمَّ أَبْلِغْهُ مَأْمَنَهُ ذَلِكَ بِأَنَّهُمْ قَوْمٌ لا يَعْلَمُونَ [التوبة:6] هذا حال الكافر المستجير فما بالك بالمسلم ، فهل تأكد الجبالي أن في تسليم البغدادي إبلاغا له لمأمنه؟ 

-خطأ تاريخي : بإعطائها صورة من هو قادر على طبخات سياسية يكون فيها المال أغلى من القانون و الأخلاق و المبادء ، تزيل النهضة أي فرق بينها و بين أزلام النظام السابق ، تؤكد ما راج من إشاعات عن عقدها صفقات مع رجال أعمال مقابل عدم المحاسبة و تفتح بتصرفها الباب على مصرعيه لعودة الأزلام بعد أن لفظتهم دماء مئات الشهداء و تكون بذلك مشاركة بجريمة ضد التاريخ.

جملة هذه الأخطاء و تداعياتها و إهانة النهضة لشركائها في الحكم بينت أن الترويكا هي فقط وهم و أن النهضة تحكم لوحدها في إزدراء كامل للقانون و الوفاق و الأخلاق و لم تبق للتكتل و المؤتمر ما يخافون عليه. 

هل لعنة البغدادي ستزلزل الترويكا؟

 أتوقع ذلك، و أتوقع أن يقفز نجيب الشابي على الفرصة لملأ الفراغ

و إن الغد لناظره قريب