السبت، 2 يوليو 2022

تحب تطيح الإنقلاب؟ علاه؟ فاش قام؟؟


إنتم تحبو تطيحو الإنقلاب، لاش؟؟ لاباس ماهو؟

الإنقلاب أحسن حاجة صارت للثورة!  الإنقلاب هدية ربانية.

شوف، نفسرلك :

زايد نتبهللو على بعضنا، بلادنا راهو فات فيها الفوت، بلادنا ingouvernable و كان تهبطلها السيد المسيح.

بلادنا معادش بلاد، اصبحت كونط في الروج، بلادنا فالسة و الباقي
c'est de la littérature.

ناخذو في المن و الصدقة باش ناكلو
on se prostitue
و حد ماحب يهزنا!
هذه الحقيقة بلا retouche.

باهي، مهمن كنت، هاو إنحيه قيس سعيد و خوذ مفاتح البلاد بسلطات فرعونية، إش عندك تعمل؟

شي ما تنجم تعمل!

قيس سعيد حاجة باهية!

تنجم إنت في نظام ديمقراطي تغلي المازوط 3 مرات في شهر و تخرج تدروش ع العباد بمنطق هم و مؤامرة غلت المازوط و العباد تلحسلك من فوق؟

تنجم إنت في نظام ديمقراطي تنحي الدعم كيما قاعد يعمل هو تو و نورمال العباد تلحسلك و مصدقة زعمة تقشقيق الأحناك و الدجل متاعك؟

تنجم إنت في نظام ديمقراطي تعفس في الإتحاد و تطرد خدامة و تبيع مؤسسات كيما بش يعمل؟

تنجم ترد الخبزة بدينار و إيترة المازوط ب 5 لاف؟

إنت ما تنجمش، هو بدا فيها و يعمل فيها!

ما نجمتش و ماكش بش تنجم، خايف تخسر إنتخابات، تسايس في سي المواطن!

حاشاكم سامحوني، طلع يحب شكون يتبرز عليه سي المواطن موش الي يخاف منه.

ماو قلنا كلام موش بش يعجب، أشرب و إلا طير قرنك.

قلنا إذا، بخبث، الحكومة، حكومتو، تعمل في برنامج ال FMI بالحرف و هو يتبهلل على الجوادير الي جاد عليها!

بلاش دروشة و بلاش ريق، البلاد ماينجم يحكمها حد، ما تتحكمش، ما فيهاش توازنات، بعيدة ياسر على الخزمة و وحده واحد مطيع جدا للبنك الدولي و الجواعة تصفقلو، ينحيلهم في خبزهم و يصفقوله، ينجم يعمل الي يلزمو يتعمل.

تو في 3 سنين، العباد بش تاكل الخراء، بش تتطرد خدامة و بش تجوع الناس و تفلس البلاد، كي هي فالسة فالسة، خليها تفلس على يديه يا أخي، تي نعمة من عند ربي هذه!

تو في 3 سنين، يصيرو حاجتين : الي يلزمو يتعمل يكون تعمل و زيد من فوق، يتحسب عليه هو!

فإنت تحب تنحيه لاش؟ تي مبعوث من السماء : بوهالي خواف كذاب خلواض، يسمع الكلام و يفلم على الجهال و هوما مصدقينو! تي باب العرش و تحل!

بعد 3 سنين ماكس، يكون تهرى و بليت أكاذيبو متع الزوالي و عمر و مليارات المليارات و يكون طبق الي يلزمو يتعمل بالحرف، ما شاء الله ما شاء الله، و تكون البرجوازية و البرجوازية الصغيرة موش كان الزوالي تمس، فيكون جاهز للقطف، لكن مع ورثة باهية، فعلية و رمزية :

- الفعلية : رجعت توازنات مالية للدولة، فتعود السياسة بمعنى البناء و المشاريع و التخطيط ممكنة.

- الرمزية : هانو في النظام الرئاسي الشعبوي البصاص، كليتو الظلف!

إي هاو المواطن بش يمشي في العفس!

الوباء و الكرادي، الكلب و العفرت، ما ربك بظلام للعبيد، حق فيهم القول مادام يجمعهم طبل و تفرقهم عصا! كي عطوهم ينتخبو إختارو فصايل و بعد كي صار إنقلاب قامو يزمرو! إش نعمللهم! بش ينالو فقط نتيجة خياراتهم! بالك يكون درس للجميع، ثماش ما الناس تعمل عقولاتها، دروس التاريخ عادة من روندا للحروب العالمية، للحرب الأهلية الامريكية، من الإسكندر و داريوس و حنبعل و سيبيون، كانت دائما في الدماء و بالدماء، هكاكة تتعلم الشعوب الي موش فاهمة خطورة خياراتها.

باهي، بعد 3 سنين، هل أنت جاهز لبعد 3 سنين؟ مهمن كنت!

لا! كان يعطوك مفاتيح البلاد، ماك بش تعمل شي، خاطركم جيل مرهز، جيل فقير، جيل الحديث و الجدال و الرفث و الفسوق، جيل عرك موش جيل بناء، تعرفو تكونو ضد حاجة : ضد فرانسا، ضد القرضاوي، ضد بعضكم.. صفر مشروع حضاري، صفر درس و تمحيص، ضد بعضكم و ما عندكم ما تقدمو كان أنفسكم الكريهة!

ما لقيت مع شكون نعمل السياسة، مع سامية لحاسة الغنوشي باش يحطلها راجلها وزير و بعد لحاسة سعيد كي في بالها بش يحط راجلها وزير؟

مع عيير دف دف دف از از از؟

مع زياد الهاشمي و البااااااااع ؟

مع جماعة لحس مؤخرات البراميل؟

ريتو سياسة إنتم؟ غلطوكم، هذاكا عهر تتعفف عليه حتى المعيز! غلطوكم موش هذيكا السياسة.

دونك، نرجعو لموضوعنا، في التلاثة سنين هاذم، متع قمة العبث و ال cynisme فرصة باش وجوه اللوح و خطابات اللوح تاخذ راحة، روترات و تكون شباب، في عقلو، يخدم السياسة كحلول : هاو أحنا فين، وين نحبو نوصلو، كيفاش نوصلو، قداش تتكلف، هاو الفلوس منين، هام les risques.. إي إي الخدمة الكاسحة الصعيبة.

قيس سعيد قاعد و البرورجوازية و البورجوازية الصغيرة و الإدارة قابلتو، خوفا من الرعاع و لانه ما ثماش بديل viable.

3 سنين خليه يستمنى، يعيش إسهالو الشكلي و في المضمون يعمل إش بش يقولولو، ترجع البلاد gouvernable، تكون الناس عملت عقلها : الجوع استاذ بارع، فيكون عندك فرصة بخطاب حقيقي و وجوه جديدة، للبناء.

هذا نفهمو إسمه سياسة : إستغلال الإنقلاب sans états d ame و تحضير ما بعده بجدبة : الباقي تفوريخ و تفركيح.

اذا ضيعت التلاثة سنين في التكتيكي موش في الستراتيجي، ستحمل وزر هذا البلد، مرتين.

براف،

حقة مبروك للنهضة و بصحتكم!

ما كنتوش تحلموا ب réhabilitation كيما هذه! ما شد فيكم حد سارق، نظفكم و لا معامل يجور، لا يخوت، لا فلوس، لا قطر ! تي مصباح علاء الدين ما ينظفكمش كيما عام قيس سعيد!

حاصيلو،

هذا البلد ماشي لكارثة إجتماعية كبرى، دون عاطفية : هذا واقع.
بلدان أخرى حولت كوارثها لنهضات و اخرى بركت فيها.

احنا بلاد طبة قارية 20 عام تبيع سرتفيكا ب5 لاف، ضباط ديوانة تترفك في المعسل، مهندسين تطفي الضو على سلامة بزوز صوردي، اساتذة تعاون في الفوسكة.. نحن فاسدون إلى درجة إستحقينا بما كسبت أيدينا خسفا من السماء.

اسوأ ما فينا يحكمنا اليوم بممارساتنا و بشعارات عكسها تماما في صحة رقعة تجي تراجيديا إغريقية.

3 سنوات، ممكن بعدها تغيير - ما تتصوروش هاك الخبيث الكذاب بش يسيب السلطة-

كان عينكم تنقصو الدروشة و تبدلو حالكم، حضرو للتغيير من تو، إذا إخترتو تقعدو تغزرو كان قدام ساقيكم : صحة الحصان.

هل يعني هذا تبطيل مقاومة الإنقلاب؟

لا! بل مقاومته مع إستغلاله، تبيين كذبه و زيفه و خبثه و دروشته، العمل على تراكمها باش في اللحظة صفر تفكر بيها هالشعب النساي.

كان ماكش تحضر في لحظة صفر، الي تعمل فيه زبد يذهب جفاء.

بالنسبة لحفلة الدروشة، لمسرحية الدستور : الي بش يصوت بلا، تقول واحد منبوز قرر موش بش ياكل الحلو في عرس أخته إلي إغتصبها دز فازتو و بش يكتب عليها الصداق!

لا ما قصرتش!

اي ماك شاركت في الإستشارة، إي بدلت حاجة؟

كلام فارغ، إسمه إنقلاب، أنت فقط مجرد كمبارس، رايك تمسح بيه، تصوت نعم، لا، ما يبدل شي، إسأل قداش من تياس قبلك، من سامية لهيكل المكي لبلعيد و محفوظ : كاغط مسح بيهم الإنقلاب زهمو! مجرد فلكلور.

لا معناها تو كي بش تقلو لا بش يبطل؟ هكة؟ ما أصغر عقلك

ها! إمالة إنت إش تحساب! بالك لعبة الإنقلاب هو!

نلخص إذا : الإنقلاب حاجة باهية و مستحقة، عقاب على فسادكم، يمكن إستغلاله ثماش ما اولادنا يعيشو خير منا، قدامنا فرصة 3 سنين، نهرسلوه فيها و نبنيو و إن كنت مأيس منكم، الشعب الي خضارو يغش و طبيبو يبعث للكلينيك و تكسيست يبمبي الكونطور و الموظف يفصع و الأستاذ يفصكي، سياسيوه من نفس طينته.. إلا من رحم ربك، إلا من رحم ربك..

يا رب، رحمتك!

أخيرا و دائما و أبدا : الحمد لله الذي أخرجنا من القرية الظالم أهلها و صحة الحصان.

الأربعاء، 6 أكتوبر 2021

الإمبراطور كومود، الإمبراطور الي الشعب يحبه


إش رايكم نحكيو على قصة الإمبراطور الروماني كومود.
Imperator Caesar Commodus




بوه مارك أورال، كان إمبراطورا محترما و محبوبا.
أول مرة تصير منذ 80 عام، الإمبراطور عنده ولد من صلبه.
فتربى كومود و كبر على أساس إنه إمبراطور

لكنه كان دلول، مرخوف، ني كيما نقولوا، فكان أصحاب بوه و السيناتورات و جنرالات الجيش و الأرستقراطيين راخين فيه العين! تو بربي هذا يجي إمبراطور!!

و كان سي كومود قلبه أكحل، يسمع و يخزن و يحط في قلبه.

عام 177، خرجت إشاعة إنه مارك أورال بوه، مات على الجبهة (ما ماتش مرض برشة و قريب يموت).

بما إنه كومود برجولية ما يجيش إمبراطور، تي حتى أمه فوستين كانت من الراي هذاكا فقامت قلاقل و إضطرابات و حاول أفيدوس كاسيوس القيام بثورة و أخذ الحكم.

لكن مارك أورال ما ماتش و فهم الي ولده كعبة لا، لاهو متع تسيير و لا متع جيش و لا متع سياسة.

هيا هزو معاه للجبهة، و قربه من العسكر و جنرالاته ثماش ما يقبلوه و عطاه و هو حي لقب أغسطس Auguste مما يعطيه جميع السلط مع بوه و بوه حي، تي على الأقل ثماش ما سي كومود يحل مخه و ينجم يتعلم كيفاش تصير الأمور و ينجم يواصل بعد بوه العصر الذهبي لروما.

عام 180 مات بوه و أصبح كومود إمبراطورا.

عاد ماو قلنا سي كومود، لا يفهم سياسة، لا إقتصاد، لا حروبات، لا تسيير و زيد الناس الكل تقارن فيه ببوه و حقروه، قال تعرفوشي كيفاش؟ هيا طز فيكم الكل! 

أنا بش نطفي السيناة و السيناتورات و السياسة و تسيير الإمبراطورية، و الإدارة، بش نخدم مع الشعب طول! دبروا فيا تره!

زيد كانت عنده مشكلة كبيرة في الثقة! ما ينجم ياثق في حد.

دور روحه بمجموعة ضيقة جدا، من ناس ما عندهمش خبرة كيفه، أصحاب و أحباب منهم حتى عبيد محررين، ربما أهمهم كليوندر.

أعطاهم الإمبراطورية يسيروها و هو تلهى يعمل في فازات يا إما باش ينتقم من أصحاب بوه الي شافوا إنه ما يجيش إمبراطور، أو باش يربح حب ال plebe و العسكر.

هاو يفرق في الأراضي، هاو يزيد في النصيب متع القمح الي يتفرق، هاو الكوليزيوم يملأ و يفرغ و العباد شايخة على الغلادياتور و زيد عمل  قانون ماكسيموم باش أسوام القمح ترخص.

و الإمبراطورية و العلاقات الخارجية و البنى التحتية و الإدارة تنهار بالشوية بالشوية.. 

عام 182 فاق بمحاولة لإغتياله مورط فيها سيناتور و أخت الإمبراطور لوسيلا (الي ما يعرفوش وقتها هو إنه كليوندر، كيما نقولوا رئيس ديوانه مورط معاهم)  

و دخل فيها صحري بحري بوه على خوه و عمل purge حق على باطل و فك كل السلطات جميعا.

لكن زادت الوحدة متاعه و قلة الثيقة في الي حوله.. سماوه وقتها الإمبراطور المعزول.

حتى مرته كريسبينا طردها و نفاها و بعد قتلها و عمل صاحبة وحدة من العبيد إسمها مارسيا ولات هي الفاتق الناطق في الإمبراطورية.

سي كليوندر، رئيس ديوانه و كان مكروه من الجميع بمختلف طبقاتهم الإجتماعية، قال شناقصني انا باش نولي إمبراطور زادة؟ تعرفش كيفاش؟ هاني بش نصنع أزمة، يعمل هكة و القمح الي ماشي للplebe ، جاي من مصر و غيرها عداه للمخازن متاعه.

بدات العباد تجوع و تتغشش.

فكرة كليوندر، إنه كي الناس معادش فيها، هو يجيبلهم القمح و يوليو يحبوه حتى هو! علاش كان كومود يتحب تره! تي الحمل الكل عليه هو و الناس تحب في كومود؟؟

المشكل كي نقص القمح جاء معاه الطاعون! و الplebe دارت على كومود و صارت إضطرابات كبيرة عام 189.

عمك كومود ما كانش من العاكسين، قتل كليوندر و لوحه للplebe
اما وقتها فات الميعاد، الناس ساي كرهت كومود

قعد يخمم يا أبولون إش نعمل، يا سيدي مينرفا دبر عليا..

تعرفشي كيفاش، شكون أكثر ناس تحبهم العباد؟ الغلادياتور؟ (كيما نقولو أحنا في وقتنا هذا ميسي و رونالدو، مصدر الترفيه و الشيخة متع الشعب).
تي باللازمة إلا ما نولي حتى أنا غلادياتور

جاب الشاف متاعهم و إسمه نارسيس و قله علمني علمني..

هيا سيدي و عملها كومود، أول إمبراطور يهبط للحلبة قدام المتفرجين يقاتل حتى الموت.

هيا سيدك ربح و هبلت هاك الplebe : سيدنا ! سيدنا! يحيا كومود! جوبيتار أحد جوبيتار أحد و كومود ما كيفو حد

و رجعت الناس تحبه! شاخ في راسو كومود و ضبع! أصبح يرى في روحه هرقل جملة، وخر وقدم و بدل المؤسسات الكل، بدل أسامي الأشهرة و زاد شهر بإسمه، تي روما بدللها إسمها ردها
Colonia Lucia Annia Commodiana
إي هكة كوموديانا، على إسمه

الراجل دخل في ميغالوماني! الشعب معايا قلهم و أنا الشعب!

آخر أعوام حكمه، زاد ضربته الوحدة و الشك و الوسواس، دار حتى على جماعته، المقربين منه، حتى مارسيا الي كانت في مقام مرته و الفاتقة الناطقة في القصر، وصللها الطش

كي ما عادش فيها، للا مارسيا تعيط لنارسيس الي دربه باش ولا غلادياتور و قتله هاي الحقيقة، راهو كومود كان يربح في أصحابك بالغشة و أثبتتله كيفاش و قتله خايفة لا يقتلني خاطر كان ال plebe تعرف الحقيقة متاعه تو تدور عليه و هو عايش كان بالحكاية هذيكا، الشعب يحبني!

في 31 ديسمبر 192 نارسيس إنتقم لأصحابه الغلادياتور و خنق كومود حتى الموت.

بعد كومود، خاضت روما! دخلت بعضها و بدات مرحلة سقوطها و إنهيارها، الي عمل تماسك روما و صمودها رغم الأزمات : مؤسسات، إدارة.. فتفتها كومود!

و تعدات سنوات زرقة على ال plebe : حروب أهلية، تقاتل، فقر..نهاية حزينة في الدماء و الموت لعصر ذهبي

الشيء الي خلاه يتعاقب بعد موته كيما نيرون ب damnatio memoriae أي المسح من الذاكرة و التاريخ و عدم تربيبه..

وصف في المصادر الشحيحة الي وصلتلنا على أنه عبثي عشوائي إعتباطي عنيف  فظ وحشي مستبد معزول وحيد غير كفؤ حل العقد النفسية متاعه بتفتيت المؤسسات.

قصة كومود تعملت عليها برشة أفلام، مثلا :
la chute de l'empire romain 1963
Gladiator 2000

و كان في التاريخ عبرة لكل إمبراطور، يفتفت المؤسسات، يمارس الشعبوية، يعزل نفسه و ما ينجمش يخدم مع غيره، كيف إنه قادر يدمر أي إمبراطورية و أي حضارة مهما كانت و لو كانت روما!

المرة الجاية نحكيلكم على كاليغولا، إمبراطور روماني واحد آخر

(الصورة هي تمثال نادر لكومود و هو يلبس جلد أسد و يحمل هراوة هسبرداس جاد عليه الي هو هرقل)

الثلاثاء، 5 أكتوبر 2021

الحبس الي فات، الحبس الي جاي، ثم ماذا؟

ع السلامة الناس الكل،

هذا المقال سيكون طويلا جدا، جدا جدا متناسبا مع طول فترة السجن السابق و اللاحق و الراحة الصحية القسرية، ثم هذا مقصود ففي زمن الشعبويات لا يقرأ الناس كثيرا، لكن متأكد الي كتبت لأجلهم سيقرؤونه و بتمعن 😉. 

نبداو بالحبس، خلي نوضحها مرة وحدة : 

لا يا جماعة سامية و أنصار قيس، يا من نهشتم لحمي باطلا، ما دخلتش الحبس خاطرني جبدت مرت جنرال كما بثثتم سمومكم.

2018 ربحت الإنتخابات بنظافة، ضد الجميع، كل الماكينات و اللوبيات و الأحزاب،  فكان لازما عقابي.

و منذ الإستقلال المحاكم العسكرية هي وسيلة العقاب لمن يزعج الحاكمين  كي ما لقاولوش رغم بحثهم المعمق سرقة أو فساد أو مخدرات يبتزوني بيها.. فعملولي زوز قضايا عسكرية على تدوينات.

رغم ذلك، روحت و كنت النائب الوحيد في تونس الي وقف قدام قاضي عسكري و تنازل عن الحصانة، إبتدائي و إستيناف و تنفيذ.

القضية الي كنت فيها في الحبس : الستاتو فايسبوك موش متاعي أصلا 🙂 ا!

جابو كلام و قالوا هذا لقيناه في صفحتك عام 2016!
باهي أعطيوني الرابط نثبت؟ ماعناش!

باهي من 2016 ل 2018 عندكم الوقت الكافي باش تعملو معاينة بعدل إشهاد، عملتوشي؟ لا!

شوية جدية يعيشكم، محكمة و قضاة و زمامر و موقفين نائب شاب مستقل معارض قدامكم، بكلام مكتوب في صفحة وورد ندرا شكون بعثهالكم؟ هكة!؟

باهي، ملي مزلت في ألمانيا و ما روحتش و ما في باليش الي عندي قضية أصلا، المحكمة طلبت إختبار فني (القاضي المدني الي طلب الإختبار، عاقبوه).
جاء الإختبار! أكد إنها ماهيش صفحتي أصلا! 

تحكمت رغم ذلك ظلما ب3 شهر سجن نافذ طاحت لشهرين في الإستيناف.
رغم أنه حكم ظالم، شعملت؟

هزيت التاليفون و كلمت وزير الداخلية هشام الفوراتي : على ذمتك نعدي حكمي.
هربت؟ تخبيت؟ سافرت؟ لا! فقط سلمت روحي و طلبت في جلسة عامة رئيس الحكومة يعلمني نجي نعدي حبسي.

علاش جلسة عامة؟ كيفاش نثبت إني فعلا سلمت روحي! نسجل تاليفونات؟ ماهيش أخلاقي.
باهي كي نخرج نقولها في الإعلام و ما يسمعنيش، رئيس حكومةمشاغله برشة! هاو في جلسة عامة بحضوره هو و وزراؤه.
علاش عملت هكة؟

من السهل أن تقرأ الفلسفة.. أصعب قليلا أن تطبق ما قرأت :

سقراط خير شرب السم و الموت على أن لا تسقط قوانين المدينة و إن كانت ظالمة.

باهي، مشات القضية للتعقيب، لأكتشف أنه على عكس المدني، في العسكري، التعقيب يوقف التنفيذ.

رفضت دائرة التعقيب العسكرية الطعن.
علاش و هو ستاتو مدلس!!

التعقيب ترفض شكلا، لأنه ثمة آجال، و الآجال هذيكا فاتت قبل ما محكمة الإستيناف العسكرية تمدلنا نسخة من الحكم، إما لتفادي الإحراج  للقضاة الي حكموا علي بالسجن بكلام مدلس كان التعقيب تنقض دون إحالة، أو لتفادي إحراج قضاة التعقيب كان أيدوا الحبس على ستاتو مدلس.

باهي، هل أعلموني بهذا؟ لا!
هل أعلموا المحامي؟ لا!

باهي هبطونيش في الروشارش كيما أي مواطن عليه حكم بات؟ لا! سافرت مرات و مرات بجوازي الأخضر و لم يعلمني أحد.

كانت ورقة، مخبينها، هاو إنجموا نحطوك في الحبس وقت الي نحبوا، ما نعلموكش خاطر كان تعلم تو تمشي إنت تسلم روحك كيما عملت قبل و أحنا نحبوا نحبسوك فقط وقت الي حاشتنا.

صار إنقلاب 25 جويلية.

كان موقفي واضح و جازم و مبدئي من النهار الأول! أول موقف و أكثرهم وضوح و مبدئية
لاني سامية و لا محمد و لا عبير، هاني معاكم و كي سيدنا ما لوحلي شي، فقنا بيه إنقلاب :)

لاني النهضة، ندافع على روحي فقط و كان سيدنا يقبل نعطيوه شرعية و نصوتوله

أكثر من هكة، حتى لا أكون في أي شبهة زعمة ندافع على شهريتي، أعلنت، زادة بوضوح أني لن أعود لذلك البرلمان.

لم يكن موقفا عاطفيا، بل فهما عميقا لعمل و دور النائب.

النائب يشرع؟ أي تشريع و أي قانون و الدستور مشى شوالق!
النائب يراقب الحكومة؟ الحكومة تو مسؤولة قدام سيدنا كهو
النائب يمثل الناس؟ غير ممكن،  لقيت روحي تهمني المؤسسات و الدستور و فصل السلط و الحريات و الحقوق على عكس الناس فما إنجمش نمثلهم!

ثم سامحني، نائب منتخب الدستور المكتوب يقول إنه في حالة إنعقاد دائم، يمنعو من دخوله عسكري بأوامر شفوية.. أحترم نفسي بما يكفي باش معادش نحط فيه ساقي إلا بعد :
- إرساء محاكمة دستورية
- محاكمة الرئيس قيس سعيد محاكمة عادلة هو و كل من أغلق البرلمان بأوامر شفوية، ربما بعد أن تصبح أحكامهم باتة، يمتعهم رئيس جديد بعفو خاص، على طريقة ديغول مع بيتان.

نهار إلي ترشحتله، كان جزء من السلطة، اليوم معادش! 

و مانيش نادم على  حتى نهار خدمته غادي، ضميري مرتاح.

نحل مشاكل حقيقية للتوانسة في نهار ب 1/217 سلطة، أكثر من الرئيس في شهرين بكل السلط.

أقل ملف خدمته، متع إستشهار جامعة كرة القدم مع أوريدو دخل للدولة 370 مليون (تقريبا شهريتي 10 سنين).

أكبر ملف خدمته، متع مارسك، الدولة طالبة فيه 300 مليار (ميزانية مجلس كامل، بالموظفين و شهريات النواب الكل و الماء و الضو و المساعدين لمدة 5 سنين).

الملفات هذه تخدمت بمنهجية و عمق و عديتها لبقية المؤسسات، لا تغفيص، لا تعميم، لا هؤلاء، لا إختفاو كي الوزراء الي عطلنا بلاد كاملة خاطر عندهم زعمة شبهات (كذب في كذب)، لا ضاعوا كيما المسؤولين الي خذاو فلوس من  الخارج و حطوها في حساباتهم و هانا نستناو،  لا هاك التقرير متع رجال الأعمال الفاسدين.. هانو حديث و بره.

جاوبت على أكثر من 60 ألف إمايل متع مواطنين.

حليت 635 ملف إجتماعي و قدمت 24 قضية جزائية و حليت 1073 ملف مع الداخلية و عملت 70 زيارة ميدانية..

النائب الوحيد، سطرلي تحت الوحيد الي ما فلت حتى أسبوع جهات ممكن (ثمة الي منعهم الكوفيد)، ما كنتش نربح في فلوس من السياسة، كنت نصرف لخدمة الناس! كل شهر معدل 600 أورو، باش نسافر نشوف 5 من الناس في قهوة.

النائب الوحيد الي في عطلته البرلمانية هز روحه و دار تونس من غزالة لذهيبة، يمشي للقهاوي يسمع في الناس! 

حتى أكثر أعدائي قلة أصل و قلة معروف ما ينجمش :

- يقدح في ذمتي المالية! لاني راشد الغنوشي باش المبروك صاحبي و لاني محمد عبو باش يمولني نصر علي شقرون

-يتهمني إني سرقت بلاصتي مرتين أو فرقت فلوس باش طلعت للبرلمان

- يقدح في جديتي و حجم و الجهد الي بذلته

- ينجم يعتبرني من عناصر ترذيل البرلمان! مانيش سامية ندربك على الطواول و  نتهم في الوزراء بدون دليل بالإعتداء الجنسي، لاني عبير كاسكة و صياح و عياط و تهريج مبتذل و لاني جماعة النهضة نصوت على قوانين مالية الأصدقاء

وقت سامية تهرج و تدربك، أمل و عمل تحكي على الماء و الطاقات المتجددة و مجلس المنافسة و فتح الإقتصاد و الرقمنة و الأمن القومي الرقمي..

وقت عبير عاملة كاسك و تهرج، قدمنا Small Business Act  : حلول حقيقية و مخدومة بعمق و تنجم غدوة تعمل دفع حقيقي للإقتصاد.

وقت باراشوكات النهضة يرشقو في الفلوس و يسبوا في النساء، أمل و عمل راجعت قانون العنف ضد المرأة و خدمت قانون لمنع الترحيل القصري.

وقت هيكل المكي معطل قانون الFCR الي قدمناه خدمة للوبيات، زدنا قدمنا مقترح ال paypal و ال bitcoin. 

وقت الي قيس سعيد مسكر على التلاقيح الي جات هبات من برة للشعب التونسي ما حبش يعطيها للحكومة و طز في التوانسة الي تموت كل يوم، كنا نقترحوا في الحلول المؤسساتية.

وقت الي المبروك عند النهضة رأس مال وطني و جماعة عبو كي تشدو بفساد ولات محاربة الفساد شعبوية و حتى البلاستيك راهو موش خايب و رد بالك تجبد الإمارات عند عبير الي تدور في المجلس تهرسل في الموظفين قال شنوة يتجسسوا للأمريكان و بعد تمشي تقابل سفير أمريكا الي قالت يتجسس علينا..أمل و عمل تخدم، تحل كل الملفات، ما تحشم و لا تقرى حساب حد.

لأجل كل هذا، و ما ينجم ينكره إلا قليل أصل، كنت أعلم و نستنى في الحبس 🙂
الي يتعارك بجد و بعمق مع السيستام، يتعاقب، ديما!

نزيدكم، عندي قضية عسكرية نهار 27 أكتوبر
و وحدة أخرى نهار 22 نوفمبر كان ما خلطتش قضية غدوة علي مكتوب اليوم 🙂 قضية 22 نوفمبر، هذه بعثهالي قيس سعيد في الحبس، كيفاش تقول إنقلاب تره!!

في الحبس كان ثمة زوز مستويات :

- الضباط و الأعوان، تعاملهم معي و مع بقية المرابيط في الشمبري،  كان تعاملا قانونيا و محترما جدا.

- إدارة السجن، نكلت بي تنكيلا! مرمدوني تمرميدا! حرمتني من حقوقي الأساسية و سببو لصحتي في شهرين أضرار لا يمكن إصلاحها، بيني و بينهم القضاء العدلي و الدولي! كل التفاصيل في كتاب هاني نحضر فيه.

خسروا عليا : تعليمات من فوق!

حرموني من المحامين، من الجوابات، من الماكلة أصلا! دخلوا يصوروا فيا في وسط الزنزانة فيديو و صوت، كي نبدل حوايجي كانت الدولة التونسية تتفرج فيا مباشر!
هناك أيام كنت فيها أقرب كثيرا للموت من الحياة! 

الأغلب سأعود قريبا جدا للسجن بعد محاكمات عسكرية على أراء و مواقف، ميسالش! هذيكا ثنيتي و إخترتها!
الحمد الله مظلوم و لست ظالما، مانيش داخل للحبس رشوة أو تعكعيك نفايات أو حانث بالقسم أو أي حاجة أخرى مشينة بالشرف.

 ما نجمش يفهمها قيس هذه، فهو لم يناضل أبدا لأجل أي شيء :).
الظلم لا يكسر من له حلم، بل يقويه!

هكة إن شاء الله واضحة الأمور بصفة نهائية، ما يغلطوكمش على أسباب سجني ظلما المرة الجاية، نغلق الملف و  توة خلي نحكيلكم زوز حكايات :

- الأولى : إختصمت إمرأتان إلى النبي سليمان عليه السلام حول أمومة طفل، قال قصوه و لتأخذ كل منكن نصفا، فرفضت إحداهما، أم الطفل حقيقة و التي تحبه أكثر و قالت يقعد حي و خلي تاخذه الأخرى.

قرأت بيان مكتب المجلس الداعي لإستئناف العمل.
أدعوهم للتراجع عنه.
فلتكونوا من يحب البلد أكثر و تتنازلوا!

أتريدون أن تصبح تونس بشرعيتين؟ بحكومتين؟
الجيش الإدارة الدولة يطيعون من؟؟  ملا شقلالة! 
إش بش تعملوا كي تسترجعوا العمل أكثر من إدخال البلد في أزمة أعمق؟
سيكون ذلك كارثيا و بآثار لا يمكن إصلاحها! تماما كقص الطفل.

لا أنتظر شيء من قيس سعيد، سكر بالسلطة و يرى في روحه هو الوطن و أي واحد ما يخممش كيفو، هو خائن فاسد مأجور
فهل فيكم أنتم رجل رشيد؟ 

- الثانية : كانت القسطنطينية محاصرة و ستسقط في حين أن الإهتمام فيها كان، هل الملائكة أناث أم ذكور

بلادكم في عزلة شديدة، ما فيهاش فلوس باش تخلص إلتزاماتها، في شلل كامل، في أزمة قانونية و دستورية و أخلاقية و مالية خانقة و إنتوما مشكلتكم.. جنس سكريتير نادية بإمتيازات رئيس حكومة؟

شفت سيرتها! معناها رفضتم الحبيب الجمني فقط لأنه ما عندوش بويضتين؟ هكة؟

فلنواصل،

باهي، ثمة بعض المجادلات الي يضهرلي زايد نقعدو نحكيو فيها كل مرة، مضيعة للوقت، هات نفضوها مرة وحدة :

- لا تأويل واسع، لا المشكل سياسي وليس قانوني لا زمامر : إسمه إنقلاب كامل و القوانين و الدساتير الكل وفات، نحن في دولة الأمر الواقع، الي قاري درج قانون و ماراش هذا من ليلة 25 هو منافق ربما كان يستنى يلوحوله في حويجة (مادية أو عاطفية)

- الإرادة الشعبية تتقاس فقط بالصناديق! كان جات بالتزمير أهبط لأي عرس في مكثر تو تلقى رئيس العالم المقبل.

ثم، بالله الرئيس المنقلب شاوركم،  إرادتكم هذه؟ خرجتوا زمرتوا و أنا في الحبس على مثلا  :

* الإجراءات هذه بلا سقف زمني؟
*إنه سيدنا عطل الباب في الدستور الي يقول راهو يحكم 5 سنين كهو؟ يعني شاوركم إذا اليوم عندنا ملك مدى الحياة؟
*إنه بش يطبع قد ما يحب فلوس، منغير ما يراقبه حد؟ و بالتالي عيشتكم بش تغلى برشة؟
*قلكم راهو الدساتير ماهيش قرآن مقدس، أما مراسيمه هو مقدسة! 

- إذا ثمة نقطة مشتركة بين قيس و عبير و الغنوشي و سامية، هي أن لا أحد فيهم يؤمن بالقانون و المؤسسات، عندهم هي مجرد سلوم يطلعوا بيه و يجبدوه، كيف كيف و روسكم و هذا خلافي الشديد و العميق معاهم و الي خلاني نحس روحي  بعيد ياسر على الموجودين الكل.

سأعطي أمثلة كيفاش :

* كي على الأخرين : قيس يولي الواو تفيد التتابع، يولي في قراءة حرفية للنص! أما كي بش يقراه للروحه، تولي كلمة في إنعقاد دائم ترف لغوي.
نظرية الظرورة ما عرفهاش وقت المحكمة الدستورية مثلا! لا عرفها فقط وقت عمل إنقلاب! رغم إنها نفس النظرية!

ال ISie و الدستور و القانون الإنتخابي باهين كي طلعوا سيدنا! أما يزي أكهو، هاو طلع سيدنا إش مزلنا نعملوا بيهم!

* عبير تحتج على "دكتاتورية الإخوان" و تحب تعبر و تعارض و تحتج و تحب على الشفافية و القرضاوي إرهابي، هذا كي تعارض
كي تحكم؟ الشعب يفهم كان بالعصا! الله و أحد! باهية الدكتاتورية و مرحبا بشيخنا الجليل القرضاوي.

*الغنوشي، باهية الديمقراطية باش يوصل بيها! كهو! موش باهية لحزبه مثلا! موش باهية حتى لمكتب المجلس

*سامية عندها خرق إجراءات جلسة في المجلس؟ كارثة!! أما خرق الدستور، حاجة قانونية و باهية
عندها معتمد نسى دجاجة : فسااااااااد، أما التعكعيك في النفايات و رئيس حكومة يقول في حكاية الكمامات ما يهمنيش و أنا كلمت الوزير باش يخالف القانون : تجاوزات بسيطة و الحديث فيها شعبويات

إنجم نكتب كتاب بالأمثلة! الناس هاذوكم الكل، الكل لا أستثني منهم أحدا : لا يؤمنون لا بالقانون، لا بالدستور، لا بالمؤسسات، لا بالديمقراطية، هي فقط أدوات و وسائل يستعملوها فقط كي هوما ضعاف و أول من يكفر بها حين تتغير موازين القوى، هي عندهم الكل، جيل كامل، مجرد سلوم، ملي يطلعوا عليه ينحوه.

هذه النقطة الأولى، الي تتضادد فيها قطعيا أمل و عمل مع الباقين الكل : نؤمن عميقا بالدستور، المؤسسات، القانون و عادلون حتى مع خصومنا.

- باهي، هل يمكن للبرلمان أن يكون خايب؟
لا! أبدا.
خلينا إنقصوا من الأفلام يعيشكم، البرلمان هو صورة حقيقية عنكم!

هذاكا إش إنتخبتوا! هذاكا إش حطيتوا في الصندوق
و لو تتعاود ألف إنتخابات هذاكا إش بش تلقاو! ديما

الخضار الي يغش في الميزان، الفرماسيان الغير مباشر الي يلقح في بلاصة غيره، البوليس الي يخليك تسوق سكران ب 30 دينار،  الأستاذ الي يقريك شطر الدرس باش تقرى إيتود، كيفاش تحبه نوابه؟

و أخطاونا بلا لوغة المال الفاسد! موش هذاكا المشكل! المشكل إنكم تبيعوا في رواحكم! لا أكثر
كل مال الدنيا ما يخليش إنسان يحب بلاده يبيع صوته
و الأخرين؟ حتى 5 لاف برة بركة!

بعد 10 سنين ما فهمناش إنه الإنتخابات حاجة جدية جدا!
مادام ما واجهناش رواحنا بهالحقيقة، كل القوانين الإنتخابية و البرلمانات ستكون تعيسة!

نوابكم ما جاوش من المريخ، إنتوما إخترتوهم على أسس عاطفية.

في الإخر، بضاعتكم ردت إليكم و فهمت علاش خسرت الإنتخابات الي فاتت.

كنت الوحيد الي جاكم و قال : مستعد نخدم و نبني مع أي تونسي تختاروه.
لم يعنكم البناء! فاش يحكي هذا؟ يا ولدي أحنا نحبو نهدمو توانسة أخرين و بش ننتخبوا أكثر واحد جالغ و قبيح باش يمرمدلنا الإسلاميين/التجمع/الإتحاد..

كن صادقا مع نفسك، كان نقلك أعطيني برنامج الي إنتخبتهم لحل إشكال صندوق الدعم، قادر تجاوبني!؟ لا!

باهي كان نقلك الي إنتخبتهم، ضد شكون؟ متأكد تنجم تجاوب و بإطناب 🙂

- سيدنا، حتى أكثر الناس دعما لك اليوم (إذا نحينا دوائر المتملقين الطامعين حول أي سلطة) راهم يعلمون أنك منقلب، و ماعندك ما تقدم و ما تنجم تعمل شي و ما عندك حتى حل.

هوما معاك موش لشخصك أو صفاتك أو إنجازاتك! هم ضد الي كان موجود و عندهم الحق! يستناو فيك فقط تكسرهم و يدوروا عليك.

الفرق بين الي معاك لذاتك و الي معاك من منطق عدو عدوي كبير!

حكيت مع مئات من أنصارك
ولا واحد قلي إنك عجبته في ربع حاجة! صفر
الكلهم يقولوا : باهي عاجبك الي كان؟

- عكس الديمقراطية الفاسدة هي الديمقراطية الحقيقية، موش الملكية الشعبوية، المؤسسات المريضة نداويوها موش نقتلوها! 

- لا رجوع إلى ما قبل 25 جويلية هي سفسطة فارغة، لا يمكن الرجوع إلى ثانية لتالي موش شهرين! 

نزيدو نقدموا بعد ما حكينا في أمور، زايد الجدال فيها مستقبلا!

سيدنا قلك عنده مشكلة مع البرلمانات و الأحزاب، مع الديمقراطية التمثيلية.

صباح الخير! بالك جاب الأسد من ذيله، الأزمة معلومة و معروفة و عالمية.

لكن البديل عن الديمقراطية التمثيلية، ماهيش القذافيات! ماهيش الملك الذي لا أحد و لا هيأة و لا مؤسسة تحاسبه في الحياة الدنيا!!!

كنا في أمل و عمل واعين بأزمة الديمقراطية التمثيلية، فبحثنا و فكرنا و جربنا و نظرنا
سيدنا يغزر للماضي يجتر تجارب فشلت، و أحنا نغزرو للمستقبل! 

البديل عن الديمقراطية التمثيلية هي الديمقراطية التشاركية، الي في ADN متع أمل و عمل، موش قيس سعيد إلى رجعنا لعصور الإنحطاط الأوروبية، متع الممالك اللا دستورية.

ثم، 
الي يحب الطماطم ترخص، يلزمه يحلل و يفهم و يخمم و يلوج في كعبة الطماطم ملي مزالت زريعة حتى توصل عجة
لكن قيس أله نفسه أو هكذا شبه له! يسخايب روحه كن فيكون! أرخصي يا طماطم ترخص! 
هاي ما رخصتش، و هاو عندك حولين كاملين رئيس، ميزانية ب 169 مليار، لم تكلف نفسك عناء الفهم و التحليل.

في هذه كيفك كيفهم، على قد ماكم مختلفين شكلا، على قد ما تشبهوا لبعضكم مضمونا : السياسة عندكم كلمنجيات! حديث و بره! أنتوما فقط كسالى و ثرثارين.

أعطوني حل واحد إقترحته النهضة في 10 سنين حكم! حل حقيقي مدروس نحكي موش سفسطة 360 نقطة

عبير طايرة في الصونداجات! تمنيتها تعطي أي ربع حل حقيقي مدروس لأي مشكل

سامية؟ خلي عاد! حتى محاربة الفساد و لات شعبوية ملي راجلها ولا وزير.

مع كسالى و ثرثارة، لا تحملون مشاريع، أنتم الكلكم مشاريع مضاددة، ضد حاجة كهو! 

هذه نقطة الإختلاف الجوهرية العميقة الثانية بين أمل و عمل و بقية الساحة السياسية بكل من فيها! 

الكل حكاو (بعدنا بالطبيعة) على مثلا ال 100 ألف منقطع عن الدراسة سنويا.
قدمشي واحد منهم حل؟ لا! فقط ينبزوا فيها ببعضهم
أحنا قدمنا!

آخر ملف خدمناه، هو حول الدعم في قطاع الحبوب (نشر يوم 25 جويلية، دقائق قبل الإنقلاب)، تطلب وحده 4 شهر خدمة، فوق 90 لقاء، بين كواشة و فلاحة و شركات مقرونة و بياعة علفة.. كامل السلسلة.

أطول ملف، ملف مارسك، 3 سنين خدمة.

و يعيشكم راهو حل، أو جزء من الحل، هو صبر طويل، و برشة خدمة متع لمان و تحليل معمق لفهم الموجود مليح.
ثم تخيل المنشود
ثم كيفاش نوصلوا من الموجود للمنشود، قداه يتكلف، الفلوس منين بش نجيبوها، شنية العوايق الي تنجم تعرضنا و كيفاش نتجاوزوها = هذا حل و هكة نخدموا و ما نخدموا كان أحنا زادة هكة في البلاد! 

و حتى الي يكابر و ما يحبش يستعرف، في أعماقه يعلم إنه هذا صحيح.

لا يا قيس، كي تقول أرخصي ما ترخصش! عندك عامين رئيس أقوى إنجاز، خدمت خدمة عون وزارة تجارة.

لا يا راشد، الإسلام الحل باش تدخل للجنة، ما يقلكش كيفاش نلقاو حل للماء، لجرايات تقاعد جيلي و إفلاس الصناديق

سامية، محاربة الفساد راهي يلزمها خدمة و تفكيك و إجتهاد، باش ما يوليش ما ثماش فساد كي راجلك وزير

عبير، بورقيبة مات الله يرحمه بالباهي بالخايب! راهو مشكلة المؤسسات الصغرى و المتوسطة و العجز الطاقي و عدم عودة الأدمغة ما تتحلش بالصياح و التهريج! كان جاء عندكم حلول رانا ريناها من زمان!

موش معناها حلولنا طيارة راهو، و إلاما نغلطوش! هي إجتهادات
لكن، نحن رغم بلاش حتى ربع إمكانيات، مختلفين رادكاليا على كل البقية! 

و عندنا مشروع : تونس خضراء رقمية.

باهي، ما العمل؟

فلنبدأ بالحديث على ما بعد قيس سعيد
أتصور ما يفوتش مارس، إلا إذا بهامة النهضة زادته شرعية

الدولة مسالة ياسر، فلوس ما ثماش، و قيس راهو مسؤول عن هذا، ما ربحش اليوم راو، عنده عامين رئيس و كل القوانين صحح فيها حتى الي قال عليها ماخذين فيها رشوة (كان متع المحكمة الدستورية الي تمنعه من الهبال القانوني).
ممكن جدا نتصنفوا قريبا غير قادرين على الإيفاء بإلتزاماتنا.
الإمارات و السعودية في الإخر ما عطاوهش فلوس!
صندوق النقد الدولي موش بش يلوح فلوسو في بلاد يحكمها سلطان ما فيهاش جرد دستور

شهر ديسمبر هذا العام قد يكون صعبا جدا! رئيسكم في باله بيت مال المسلمين فأعطه ألف درهم في حين أن الأمور أكثر تعقيدا بكثير.

قيس سعيد لن يترك السلطة و لو ضربنا بالرصاص و هذا حديث آخر...

ربما النهضة تحل نفسها كحزب، يضهرلي بان اليوم بالكاشف إنه ما عندها ما تقدم في الحكم و هي عبء على أي معارضة.
ثم، نترك الناس الي زمرتله، تتفاهم معاه! على الأقل بعد ما تفيق من السكرة، يكون لتلك الناس بديل حقيقي، متع شباب عنده مشروع يبني معاه تونس متع بعد كل هذا.

هذا البلد يحتاج أفكار كبيرة، جديدة فعلية، عندنا هذا! 

لن نعيدأخطاء آبائنا و أجدادنا! هم عارضوا بورقيبة و بن علي بشراسة،يوم قالولهم إيجاو إحكموا ما عرفوش! 

سنقاوم الإنقلاب بشراسة، لكن سنعمل بجد و بعمق على حلول و بدائل. 

قلقت من الكتيبة، نكمل زوز أفكار بعجالة :

1- ثورة تصحيح المسار، راهي ماهيش متع سيدنا! ردوا بالكم مع الألفاظ الي يختارها الإنقلابي! 

ثورة تصحيح المسار، هي لأنور السادات عام 1971! كان محقور جدا، فهو يخلف عبد الناصر، إلى أن زعمة زعمة فاق بمؤامرة، ففتقهم من بعضهم حق و باطل و أصبح دكتاتورا دمويا قاده الأمر للتطبيع و الكنيست.

لا يخفى على أي متابع دقيق،  أن قيس سعيد مغرم جدا زادة بتقليد خطوات بونابارت، تقليد سخيف في الواقع.

نتفكر في الحبس قريت أرتيكل في إحدى الجرائد : قيس سعيد، البونبارتيزم دون أن يكون بونابارت

بونابارت فك السلطة، صارت ضده محاولة إغتيال فاشلة Attentat de la rue Saint-Nicaise، إستغلها لرحي كل خصومه 

و رغم أن الي خططوا و فشلوا هم ملكيون رحاها بوه على خوه! و خاصة اليعاقبة les jacobins الي لا عندهم لا يد لا ساق!

و توة بعد أكثر من 200 عام، خرجت تقارير كانت سرية على إنه وزير داخلية نابوليون كان في باله قبل بشهر..

بن علي زادة رحاها خوه على بوه، لما إكتشف مؤامرة لقتله بصاروخ ستينغر (ما ثماش منها راو! قدموا للمحكمة العسكرية كلاب و كارابيلا)

و بما أن سيدنا، يكشف دائما عن أوراقه، و حكى على الموضوع مرات، ربما سيتزامن الأمر مع أصعب اللحظات الإقتصادية، أراهن أنه سيعلن عن إكتشاف محالة فاشلة لقتله، فيقلب البلاد بالحديد و النار، و لن يسأله أحد، سيدنا .. ويني الأموال المنهوبة؟ باهي ويني الطماطم؟
تصحيح المسار 🙂

2- موش بش نقرى التعليقات، رجاء كان جاء واحد يقلي يا نهضاوي من جماعة : التيار، الشعب، عبير و واحد يحب يربح فيهم ثواب : فكروهم إنه محمد عبو طلع مرتين وزير، مرتين مع أخيب نهضة ممكنة و الي حزبه صوت لحكوماتها الكارثية، موش ياسين العياري، إنه حزبه منافق، يعارض النهضة فقط كي ما يلقاش معاها ما ياكل، الي سالم الأبيض الي حزبه زعمة ضد النهضة، طلع وزير معاها، و بررلها و صوتلها، و الي كريفة صوت لحكومة علي العريض موش ياسين العياري.
هؤلاء ما عندهمش مشكلة مع النهضة، مع الفشل، مشكلتهم الوحيدة : بايهم، لوحهولهم يجيو معاك! 

و ماثماش علاش تكون عندهم مشكلة أصلا، هم متشابهون جدا، تي كيف كيف ملخر : نفس الجيل، يرون السياسة ثرثرة، كان الحديث بلا فعل، الحقوق و الحريات و الديمقراطية عندهم فقط سلوم و اليوم هز منهم أي واحد يحكم تو يحط تكنوكرات و يقعد يثرثر!

نذكركم الي عدى راشد الغنوشي لفرقة مكافحة التهرب الضريبي، ياسين العياري موش محمد عبو، و الي عدى أنور معروف يبحث، ياسين العياري موش سالم الأبيض، و الي فكك أخطبوط مارسك و علاقته بالنهضة ياسين العياري موش عبير موسي و لا قيس سعيد، ماو قلنا هوما متع التجغجيغ، في الساحة السياسية الكل، أحنا برك نخدموا.. هاذوما Facts.

الي لم يقرأ و يعلق، موش مهم، لا أكتب إليه أصلا :) 

 يتبع بإذن الله إن لم أعتقل الليلة، فضعف و هشاشة و تخبط هذا الإنقلاب، أصابته بسعار، فصار يحاكم عسكريا (مع الاختطاف، إستدعاء ما يكفيش، لازم البلطجة) حتى من يتجرأ و  يقرأ شعرا !

عدنا!

مذكرات نائب تحت la monarchie populiste militaire
اليوم الثاني و السبعون.

#أمل_و_عمل_و_مقاومة 
#ما_ينفع_الناس
#لا_للمحاكمات_العسكرية_للمدنيين

الثلاثاء، 27 يوليو 2021

Vive la Reine

 سأكتب هنا، ولكن ليس لكم، بل للتاريخ، و لضميري.



سأبين في هذا المقال، بهدوء و بساطة :


- أنه إنقلاب و عسكري

- من خطط له و كيف، داخليا و خارجيا و لماذا الآن

- لماذا ستتحطم آمالكم في إصلاح جذري


مقال من 3 أجزاء، بهدوء و تروي وسط هوجة العواطف، سأتحمل مسؤوليته السياسية اليوم، فالسياسي الذي يقف ضد التيار تجرفه السيول، لكن هكذا أرى السياسة: قول و فعل ما يجب للمساهمة في المصلحة العامة، لا الترسكية على مشاعر الناس و الركوب عليها لتحقيق مصلحة ذاتية.


نبدأ إذا،


إستند الإنقلابي على الفصل 80 أو هكذا قال و نفى عن نفسه صفة الإنقلابي و دعانا إلى مراجعة الدستور.

راجعناه!

وجدنا أن إعفاء رئيس الحكومة، ليس من مشمولاته و لا يوجد نص واحد يسمح بهذا

وجدنا أن إعفاء الوزراء إختصاص حصري لرئيس الحكومة

وجدنا أنه لا يوجد حاجة إسمها تجميد البرلمان في كل النصوص التونسية، وجدناه في حالة إنعقاد دائم! شعمل؟ أغلقه بإستعمال البنادق و البوط العسكري

وجدنا أنه لا يستشار إلا في الخارجية و الدفاع لا غير

وجدنا أن النيابة العمومية مستقلة و لا يمكن ترؤسها من قبله

وجدنا أن الحكومات مسؤولة أمام البرلمان لا أمام الرئيس

وجدنا حرية التعبير ما إسمهاش تطاول على رموز الدولة

وجدنا أنه لا يمكن  غلق مكتب وسيلة إعلام بالتعليمات

وجدنا أن الفصل 80 يجبر إستشارة رئيس الحكومة و رئيس البرلمان موش ينحيهم

وجدنا رئيس الحكومة محتجز و ممنوع من الكلام بإستعمال البنادق


هو إنقلاب بنفس الصورة لو أعلن رئيس الحكومة عزل الرئيس و بعث الطرهوني يحاصر القصر.


إنقلاب بفصل دستوري؟ دون إراقة دماء؟ تلك عادة تونسية! عملها بورقيبة مع محمد الأمين باي و بن علي على بورقيبة و الزوز إستبشر بها الشعب و أقام الإحتفالات.


هو إذا إنقلاب على كل الدستور، عمل دستور وحده و فرضه بالبنادق.


إنقلاب و شايخين بيه؟ حقكم! لكن ما نتدروشوش على بعضنا، لا دستور و لا فصل 80 و لا زمامر، فلتكن لنا الشجاعة و النزاهة لتسميته بإسمه : إنقلاب و إطاحة بالدستور و العقد الإجتماعي بإستعمال الجيش.


نحن إذا في اليوم الثالث من

la monarchie populiste militaire.


إي أما أحنا قابلين و شايخين و الغلطة غلطة الديمقراطية المغشوشة و توة الإنقلاب صار و لازم نشوفو كيفاش نقبلوا الأمر الواقع و نحافظ على المكتسبات..


لا أدري لماذا يذكرني هذا، بوحدة إغتصبوها، يجيها خوها الكبير يقلها، شوف الغلطة غلطتك، إنت علاش تلبس في روبة قصيرة، توة الي صار صار عرس بيه و أستر على روحك..


ثم، ديمقراطية مغشوشة آش؟ تبيع روحك ب 20 دينار و تنتخب شلايك و الغلطة من الديمقراطية؟


على كل، 

هالإنقلاب من خطط له و كيف و لماذا الآن؟


سأسرد معطيات، من حقك تنكرها و لا تستسيغها و ترفضها.


- فرنسا أعلمت كل السفارات الأجنبية بالموضوع منذ يوم  11 جويلية، كان تتفكرو هذاكا علاش الأمريكان حذروا رعاياهم من الذهاب لتونس.


- ضاحي خلفان له علم و نشر ذلك منذ 22 جويلية حين جاء الضوء الأخضر الأمريكي (قال ضربة موجعة للخوانجية ما قالش القضاء عليهم).


- التلاقيح الي جات من فرانسا و مساعدات من مصر و السعودية كانت من باب التحضير، حتى تعطي إنطباعا على إنفراج الأزمة مباشرة بعد الإنقلاب.


- هدف الإنقلاب هو ليبيا و عركة إعادة إعمارها و حسم دخول تونس في محور السعودية مصر فرنسا الإمارات.


- الرئيس مجرد أداة في هذا كيما إرادتكم الشعبية.


- الأمريكان وافقوا لأن الأزمة المالية و الإقتصادية خانقة جدا و تتطلب "إصلاحات هيكلية و موجعة" و النهضة تهرات و لا مشروعية لها فالإقدام على الإصلاحات بوجودها قد يتحول إلى إحتجاجات عميقة  تؤدي إلى ثورة عنيفة تضر إستقرار كامل المنطقة.


قله إرادة شعبية!


 تي خوفا من تطور الإرادة الشعبية إلى كنس للمنظومة من جذورها، من كنس العائلات النافذة و الإتحاد و دولة أرجع غدوة و عقلية المتراك، خوفا من الشباب الي بدأ وعيه يتراكم، ركبوا عليها خارجيا بإستعمال المنقلب حتى توجه ضد جناح واحد من أجنحة السيستام الي بطبيعته إستوفى كل ما عنده و ماعاد عنده ما يقدملهم.


لماذا ستتحطم آمالكم في إصلاح جذري؟


شفتو المنقلب البارح جاب سمير مجول و طمنه على "الرأس المال الوطني" :)


شفتو الأوامر متع المنقلب الي خرجت في الرائد الرسمي، لا فيها لا تجميد لا حصانة لا تعليق ديون لا زمارة :)


شفتو الي لا إعتقالات لا إقامة جبرية لا منع سفر (فقط تعليمات شفوية، سيدنا قال، موش نص قانوني ) 


شفتو إنه لا الغنوشي لا المبروك و لا اللطيف لا شقرون.. لا أحد من رأس المال الوطني و من النهضة وقع إزعاجه.


علاش؟


شرط الأمريكان : لا تغيير في العمق، النهضة تقعد مجرد حزيب ستعرض عليه المعارضة الكرطونية و المساندة النقدية و سيقبل و سيعطي الثقة لحكومة الرئيس، لا إعتقالات و لا محاكمات و لا مسان بوليس و لا مسان نواب و لا برلمان، مع غياب أي تغيير جوهري و عميق في البلاد.


الأمريكان و الألمان، وساطة مع النهضة = تشرب و تسكت و يمشي الغنوشي، لا رابعة في تونس و لن تفتح ملفاتكم الكبرى و سيسمح بالخروج الآمن.


ربما بعض الإستعراض الذي سيتم خاصة بنواب إئتلاف الكرامة و مموليهم و تحجيم عبير التي إنتهت مهمتها (كانت دون علمها الخطة ب و مغنيلها الي هي الخطة الأصلية و جد عليها)


فلنلخص إذا،


إسمه إنقلاب عسكري ألغى الدستور، بتخطيط و تنسيق أجنبي، هدفه إستباق تنامي الغضب و توجيهه ضد جزء من السيستام الي تهرى (النهضة و باراشوكاتها الي عافتهم العباد) تدخل به تونس رسميا المحور الإماراتي مما سيسمح لفرنسا المقصاة من ليبيا بالمشاركة في كعكة إعادة الإعمار و لإستعمال شرعية الرئيس للقيام برفع الدعم و بقية "الإصلاحات الموجعة" عبر كوميسيون مالي و "حماية" غير معلنة و يجب أن لا تتم لا إعتقالات و لا محاسبات و لا تغيير يتجاوز جماعة الكرامة و عبير : إدارة بايدن لا تريد دماء و غلق التلافز و المحاكمات يحرجها و رأس المال " الوطني" هو  كمبرادور محمي.


إي أما كيف المنقلب يعمل هكاكة، ماهي ،تتفتفت شعبيته؟


بش يصرف من الإنقلاب و الهوجة العاطفية، ثم من حديث الغرف المظلمة و المؤامرات، ثم حين يتهرى و ماعاد عنده ما يقدم و قبل الإرادة الشعبية سيتم تغييره! ديسمبر 2010 فاجأهم و غير المعطيات، لم يعد هذا مسموحا : كل ما تقرب بوادر التغيير و يتنامى الغضب يغيرو هوما.


كملت.


سبني الآن قد ما تحب، قد ما تنجم، الآن فقط ضميري مرتاح.


بعد أقل من 3 سنوات، ربما ستتذكر شكون السياسي الي همته الإنتخابات فمشى في خطك و بحث عن تموقع لنفسه و ركب الموجة و شكون في قلب عربدة الضوضاء، وقف ... قلك الحقيقة و سماها كما هي :


monarchie populiste militaire.


اللهم قد بلغت فأشهد! نهاركم طيب، صحة الحصان و God save The Queen.